బీఆర్ఎస్ ఎంపీలు ఒక్కొక్కరుగా పార్టీని వీడుతున్నారు. వచ్చే ఎన్నికల్లో టికెట్ వస్తుందనే నమ్మకం లేకపోవడమే ఇందుకు ప్రధానగా కనిపిస్తోంది. సిట్టింగ్ ఎంపీల్లో ఇద్దరు లేదా ముగ్గురికి మాత్రమే టికెట్ హామీ లభించడం, మిగతా వారి అభ్యర్థిత్వాలపై పార్టీ అధినేత కేసీఆర్ సైలెంట్గా ఉండటంతో కొంత మంది ఎంపీలు తమ దారి తాము చూసుకుంటున్నారు.
గత లోక్సభ ఎన్నికల్లో బీఆర్ఎస్ తొమ్మిఇది ఎంపీ స్థానాలను కైవసం చేసుకుంది. వీరిలో మెదక్ ఎంపీ కొత్త ప్రభాకర్ రెడ్డి దుబ్బాక ఎమ్మెల్యేగా ఎన్నికయ్యారు. మరోవైపు పెద్దపల్లి ఎంపీ వెంకటేశ్ నేత ఇప్పటికే పార్టీని వీడి కాంగ్రెస్లో చేరారు. అదే వరుసలో నాగర్కర్నూలు ఎంపీ పీ రాములు సైతం పార్టీని వీడి బీజేపీలో చేరిపోయారు. తాజాగా జహీరాబాద్ ఎంపీ బీబీ పాటిల్ సైతం బీఆర్ఎస్కు గుడ్బై చెప్పారు. ఆయనకు పార్టీ కండువా కప్పి బీజేపీ జాతీయ అధ్యక్షుడు పార్టీలోకి ఆహ్వానించారు.
మిగిలిన ఐదుగురిలో సిట్టింగ్ ఎంపీలు రంజిత్రెడ్డి (చేవెళ్ల), నామా నాగేశ్వరరావు (ఖమ్మం)లకు మాత్రమే వచ్చే ఎన్నికల్లో పోటీకి కేసీఆర్ గ్రీన్ సిగ్నల్ ఇచ్చారు. మిగతా సిట్టింగ్ ఎంపీలు పసునూరి దయాకర్ (వరంగల్), మాలోత్ కవిత (మహబూబాబాద్), మన్నె శ్రీనివాస్రెడ్డి(మహబూబ్నగర్)కి తిరిగి టికెట్ లభించే అంశంపై ఎలాంటి నిర్ణయం తీసుకోలేనట్లు తెలుస్తోంది. ఈ నేపథ్యంలో మరికొంత మంది ఎంపీలు పార్టీని వీడే అవకాశం ఉన్నట్లు విశ్వసనీయ సమాచారం.
వచ్చే ఎన్నికల్లో కాంగ్రెస్, బీజేపీని ఢీకొట్టే సత్తాగల అభ్యర్థులను బరిలో దించడం లక్ష్యంగా కేసీఆర్ సమాలోచనలు చేస్తున్నట్లు తెలుస్తోంది. ఇప్పటికే లోక్సభ నియోజకవర్గాల వారీగా ఇప్పటికే అభ్యర్థుల ఎంపిక ప్రక్రియపై కసరత్తు ప్రాథమికంగా పూర్తిచేసినట్లు సమాచారం. ఈ నేపథ్యంలో సిట్టింగ్లకు చాలా మందికి టికెట్ కేటాయించకూడదనే ఆలోచనలో గులాబీ బాస్ ఉన్నట్లు సమాచారం.
