జగిత్యాల జిల్లాలోని కోరుట్ల పట్టణంలో సెక్స్ రాకెట్ గుట్టు రట్టయ్యింది. ఓ వ్యక్తి గుట్టుచప్పుడు కాకుండా వ్యభిచారం నిర్వహిస్తుండగా కోరుట్ల పోలీసులు అరెస్టు చేశారు. పట్టణంలోని ఆదర్శనగర్ కాలనీలో సోమవారం రాత్రి 11 గంటలకు ఓ ఇంట్లో వ్యభిచారం నిర్వహిస్తున్నట్లు స్థానికులు పోలీసులకు సమాచారం అందించారు. వెంటనే రంగంలోకి దిగిన పోలీసులు రెండు జంటలు, ఓ నిర్వాహకున్ని అదుపులోకి తీసుకున్నారు.
గత కొంతకాలంగా కోరుట్ల, మెట్‌పల్లి, పట్టణ శివారు కాలనీల్లో అసాంఘిక కార్యకలాపాలు జరుగుతున్నాయని పెద్దఎత్తున ఫిర్యాదులు వెల్లువెత్తడంతో పోలీసులు నిఘా పెట్టారు. ఈ క్రమంలోనే సోమవారం సమాచారం అందడంతో పోలీసులు విటులను రెడ్ హ్యాండెడ్‌గా పట్టుకున్నారు. ఈ సెక్స్ రాకెట్ నిర్వాహకుడికి రాజకీయ పరంగా పరిచయాలు ఉన్నట్లు సమాచారం. కాగా, అదుపులోకి తీసుకున్న ఇద్దరు విటులు, నిర్వాహకుడిపై కేసు నమోదు చేసి దర్యాప్తు చేస్తున్నట్లు కోరుట్ల ఎస్ఐ శ్రీకాంత్ తెలిపారు.
