మండుతున్న ఎండల్లో శరీరం త్వరగా అలసిపోతుంది, లోపల వేడి పెరిగిపోతుంది. ఇలాంటప్పుడు మార్కెట్లో దొరికే కృత్రిమ పానీయాల కంటే, మన ఇంట్లోనే తయారు చేసుకునే ‘బార్లీ నీళ్లు’ సూపర్ డ్రింక్లా పనిచేస్తాయి. ఇది కేవలం దాహం తీర్చడమే కాదు, ఒంట్లోని వేడిని లాగేసి తక్షణ శక్తిని ఇస్తుంది. మరి ఈ బార్లీ నీళ్లలో ఉన్న పోషకాలు ఏంటి? దీన్ని ఎలా తయారు చేసుకోవాలో ఇప్పుడు సింపుల్గా తెలుసుకుందాం.
పోషకాల గని ఈ బార్లీ: బార్లీ నీళ్లను ఒక సహజ సిద్ధమైన ఔషధంగా చెప్పుకోవచ్చు. ఇందులో ఫైబర్ (పీచు పదార్థం) పుష్కలంగా ఉంటుంది, ఇది జీర్ణక్రియను మెరుగుపరిచి గ్యాస్, ఎసిడిటీ వంటి సమస్యలను దూరం చేస్తుంది. అంతేకాకుండా మాంగనీస్, మెగ్నీషియం, క్యాల్షియం, ఐరన్ మరియు జింక్ వంటి ఖనిజాలు దీనిలో మెండుగా ఉన్నాయి. ఇక ఇవి మన రోగనిరోధక శక్తిని పెంచడమే కాకుండా, శరీరంలోని చెడు కొలెస్ట్రాల్ను తగ్గించడానికి కూడా సహాయపడతాయి.
బార్లీ నీళ్లు ఎలా తయారు చేయాలి?: బార్లీ నీళ్ల తయారీ చాలా సులభం. ముందుగా బార్లీ గింజలను తీసుకుని దోరగా వేయించి, మెత్తటి పొడిలా చేసుకోవాలి. ఇక ఇప్పుడు ఒక గిన్నెలో మూడు కప్పుల నీటిని తీసుకుని బాగా మరిగించాలి. నీళ్లు మరుగుతున్నప్పుడు అందులో రెండు స్పూన్ల బార్లీ పొడి వేసి కలపాలి. సుమారు 15 నిమిషాల పాటు తక్కువ మంట మీద ఆ పొడి మెత్తగా అయ్యే వరకు ఉడికించి, ఆ తర్వాత వడకట్టుకోవాలి.
రుచిగా.. ఆరోగ్యంగా..: కేవలం బార్లీ నీళ్లు తాగడం కొందరికి నచ్చకపోవచ్చు. అలాంటి వారు ఈ నీటిలో పావు గ్లాసు పల్చని మజ్జిగ, కొద్దిగా ఉప్పు కలుపుకుని తాగితే అమృతంలా ఉంటుంది. పులుపు ఇష్టపడేవారు కొంచెం నిమ్మరసం కూడా కలుపుకోవచ్చు. ఇలా తాగడం వల్ల శరీరానికి కావాల్సిన ఎలక్ట్రోలైట్స్ అందుతాయి. ఎండలో తిరిగి వచ్చినప్పుడు ఈ పానీయం తాగితే వడదెబ్బ తగలకుండా ఉంటుంది.
ప్రకృతి మనకు ప్రసాదించిన అద్భుతమైన పానీయం బార్లీ నీరు. ఖరీదైన కూల్ డ్రింక్స్ జోలికి వెళ్లకుండా, చవకగా ఇంట్లోనే దొరికే బార్లీతో ఈ వేసవిని హ్యాపీగా, కూల్గా గడిపేయండి. ఆరోగ్యంతో పాటు హుషారు మీ సొంతం అవుతుంది.
గమనిక: బార్లీ శరీరంలోని వేడిని తగ్గిస్తుంది కాబట్టి, ఇప్పటికే జలుబు లేదా ఆస్తమా వంటి సమస్యలు ఉన్నవారు తక్కువ మోతాదులో తీసుకోవడం మంచిది. అలాగే కిడ్నీ సమస్యలు ఉన్నవారు డైట్లో చేర్చుకునే ముందు ఒకసారి నిపుణులను సంప్రదించడం ఉత్తమం.
