రెండో రోజు తెలంగాణ కేబినెట్ సమావేశం కాసేపటి క్రితమే ప్రారంభం అయింది. ఈ రోజు కేబినేట్‌ సమావేశంలో ఉద్యోగ ఖాళీల భర్తీకై చేపట్టాల్సిన చర్యలు, ఖాళీల గుర్తింపుపై చర్చ జరుగనుంది. ఈ నేపథ్యంలో కేబినేట్‌ సమావేశానికి అన్ని శాఖల కార్యదర్శులను పూర్తి వివరాలతో హాజరు కావాలని ఆదేశాలు జారీ చేశారు.
అన్ని రకాల పోస్టులలో ఖాళీలను గుర్తించిన తర్వాత ప్రతి సంవత్సరం రిక్రూట్ మెంట్ కోసం ‘వార్షిక క్యాలెండర్ ’ తయారు పై ఈ సమావేశంలో చర్చ జరుగనుంది. ప్రతి సంవత్సరం ఖాళీల భర్తీకై.. ‘వార్షిక నియామక కేలెండర్’ (జాబ్ కేలెండర్) ను తయారు చేసి అందుకు అనుగుణంగా విధిగా భర్తీ ప్రక్రియ నిర్వహించాలని భావిస్తోంది ప్రభుత్వం.
అలాగే… రిజిస్ట్రేషన్ ఛార్జ్ ల పెంపు… భూముల విలువ పెంపు పై ఈ రోజు కూడా కేబినెట్ చర్చించే అవకాశం ఉన్నట్లు సమాచారం అందుతోంది. కాగా.. నిన్నటి కేబినేట్‌ భేటీలో పల్లె ప్రగతి, వ్యవసాయం, కృష్ణా జలాలు, మున్సిపాలిటీ అభివృద్ది తదితర అంశాలపై చర్చ జరిగింది.
