తెలంగాణ రాష్ట్ర ప్రభుత్వం రాష్ట్రంలోని వివిధ శాఖల్లో ఖాళీగా ఉన్న ఉద్యోగాల భర్తీకి వరుసగా నోటిఫికేషన్లను విడుదల చేసిన విషయం తెలిసిందే. ఈ నేపథ్యంలో పోలీస్‌ శాఖలోని ఖాళీలకు కూడా నోటిఫికేషన్‌ విడుదలైంది. అంతేకాకుండా ఇప్పటికే ఓ సారి దరఖాస్తు తేదీని ఈనెల 26కి పొడగించారు. రాష్ట్రంలో పోలీస్‌, ఎక్సైజ్‌, జైళ్లు, అగ్నిమాపకశాఖల్లో పోస్టులకు దరఖాస్తు గడువు ఈ నెల 26న రాత్రి 10 గంటలకు ముగియనున్నది. వాస్తవానికి ఈ నెల 20న రాత్రి 10 గంటల వరకు తుది గడువుగా తెలంగాణ రాష్ట్ర స్థాయి పోలీస్‌ నియామక మండలి(టీఎస్‌ఎల్పీఆర్బీ) ప్రకటించింది.
అయితే అభ్యర్థుల విజ్ఞప్తి మేరకు యూనిఫాం సర్వీసెస్‌ ఉద్యోగాలకు ప్రభుత్వం మరో రెండేండ్లు వయోపరిమితి పెంచింది. ఈ నేపథ్యంలో దరఖాస్తుల స‌మ‌ర్ప‌ణ‌కు 26వ తేదీ వరకు గ‌డువును పొడిగించారు. అన్ని విభాగాల్లో కలిపి 17,516 పోస్టులకుగాను ఇప్పటివరకు 11 లక్షల 80వేల దరఖాస్తులు వచ్చినట్టు బోర్డు వర్గాలు వెల్లడించాయి.
