టిడిపి సీనియర్ నేత, మాజీ మంత్రి బొజ్జల గోపాలకృష్ణారెడ్డి మృతిపై రాజకీయ ప్రముఖులు సంతాపం ప్రకటిస్తూ ఉన్నారు. ఇందులో భాగంగా టిఆర్ఎస్ అధినేత తెలంగాణ సీఎం కేసీఆర్.. బొజ్జల మృతిపై సంతాపం తెలుపుతూ కాసేపటి క్రితం ఓ ప్రకటన విడుదల చేశారు. సహచరుడు, ఆత్మీయుడిని కోల్పోయానంటూ కెసిఆర్ సదరు ప్రకటనలో పేర్కొన్నారు. బొజ్జల కుటుంబ సభ్యులకు ఆయన తన ప్రగాఢ సానుభూతిని తెలియజేశారు.
టిఆర్ఎస్ ఆవిర్భావానికి ముందు కెసిఆర్ కూడా టిడిపిలో కొనసాగిన సంగతి తెలిసిందే. ఈ క్రమంలో పార్టీకి చెందిన పలువురు కీలక నేతలతో కెసిఆర్ అత్యంత సన్నిహితంగా మెలిగేవారు. అలాంటి నేతల్లో బొజ్జల కూడా ఒకరు. ఈ కారణంగానే బొజ్జల మృతి వార్త తెలిసిన వెంటనే తమ ఆత్మీయుడిని కోల్పోయానంటూ కేసీఆర్ సంతాపం ప్రకటించారు.కాగా కొద్దికాలంగా అనారోగ్యంతో బాధపడుతున్న గోపాలకృష్ణా రెడ్డి కొద్దిసేపటి క్రితం అపోలో ఆసుపత్రిలో గుండెపోటుతో తుది శ్వాస విడిచారు.
