గత తొమ్మిదేళ్లలో కేంద్ర సర్కార్ 4 కోట్ల ఇళ్లు నిర్మించిందని బీజేపీ రాష్ట్ర అధ్యక్షుడు, కేంద్ర మంత్రి కిషన్ రెడ్డి అన్నారు. గతంలో బీఆర్ఎస్ ప్రభుత్వం ఒక్క ఇళ్లు కూడా కట్టలేదని ఆరోపించారు. కాంగ్రెస్‌ ప్రభుత్వం అనేక హామీలు ఇచ్చిందని.. హామీలు ఎలా అమలు చేయాలనే దానిపై ఆ పార్టీకి సరైన రూట్‌ మ్యాప్‌ లేదని తెలిపారు. బీఆర్ఎస్ ప్రభుత్వం గతంలో జీతాలు కూడా ఇవ్వలేకపోయిందని విమర్శించారు.
లోక్‌సభ ఎన్నికల్లో ఆ పార్టీకి ఓటు వేస్తే మూసీలో వేసినట్లేనని వ్యాఖ్యానించారు. పార్లమెంట్ ఎన్నికల్లో బీఆర్ఎస్ ఎంపీలు గెలిచినా, ఓడినా వచ్చే నష్టం ఏమీ లేదని పేర్కొన్నారు. కేంద్రంలో ఉన్న తమ సర్కార్ 15 వందలకుపైగా పనికిరాని చట్టాలను రద్దు చేసిందని ఈ సందర్భంగా కిషన్ రెడ్డి వెల్లడించారు. ఉమ్మడి రంగారెడ్డి జిల్లాలోని వివిధ పార్టీలకు చెందిన పలువురు నేతలు బీజేపీ రాష్ట్ర కార్యాలయంలో కేంద్రమంత్రి కిషన్ రెడ్డి సమక్షంలో కాషాయ కండువా కప్పుకున్నారు.
