రేపటి నుంచి వైయస్సార్ తెలంగాణ పార్టీ అధ్యక్షురాలు వైఎస్ షర్మిల పాదయాత్రకు వరంగల్ పోలీసులు అనుమతి నిరాకరించారు. పిబ్రవరి 2 నుంచి పాదయాత్ర చేయాలని అనుమతి ఇచ్చారు పోలీసులు. 15 షరతులతో కూడిన అనుమతి ఇచ్చారు వరంగల్ పోలీసులు. పోలీసుల అనుమతి మేరకు ఫిబ్రవరి 2న ప్రజా ప్రస్థానం పాదయాత్ర పునఃప్రారంభం కానుంది.
నర్సంపేట నియోజక వర్గం శంకరమ్మ తాండా గ్రామం నుంచి ఈ పాదయాత్ర ప్రారంభం కానుంది. ఇప్పటికే 3512 కిలోమీటర్ల మేర పాదయాత్ర పూర్తి చేశారు షర్మిల. మరో 4 వేల కిలోమీటర్ల మైలు రాయి చేరుకునేలా ప్రజా ప్రస్థానం పాదయాత్ర సాగనుంది. ఉమ్మడి వరంగల్ జిల్లాలో మిగిలిన 8 నియోజక వర్గాలో పాదయాత్ర కొనసాగించనున్నారు. వరంగల్ జిల్లా ముగించుకొని మరలా పాలేరు నియోజక వర్గంలో అడుగు పెట్టేలా రూట్ మ్యాప్ సిద్ధం చేశారు.
ఫిబ్రవరి మూడో వారంలో పాలేరు నియోజక వర్గంలో ప్రజా ప్రస్థానం పాదయాత్ర ముగింపు సభని ఏర్పాటు చేయనున్నారు. ఈ సందర్భంగా వైయస్ షర్మిల మాట్లాడుతూ.. మా పాదయాత్ర కేసీఅర్ పాలనకు అంతిమ యాత్ర అన్నారు. మా గొంతు నొక్కేందుకే 15 కండీషన్లు పెట్టారని ఆరోపించారు షర్మిల. కండీషన్లు పెట్టినా ప్రజా సమస్యలు తెలుసుకోవడమే మా కర్తవ్యం అని స్పష్టం చేశారు.
