అకస్మాత్తుగా డబ్బు అవసరమైనప్పుడు ఒకప్పుడు ఫ్రెండ్ ని,బంధువులు ను అడిగేవాళ్ళు కానీ ఇప్పుడు ఫోన్‌లో ‘లోన్ వెంటనే’ అని మెరిసే యాడ్స్, యాప్‌లు కనిపిస్తుంటాయి వెంటనే వాటిని ఇన్స్టాల్ చేస్తాము. ఈ తక్షణ పరిష్కారాల వెనుక ఎంత పెద్ద ప్రమాదం దాగి ఉందో మీకు తెలుసా? “వడ్డీ రెట్టింపు, వేధింపులు విపరీతం” అనే నినాదంతో పనిచేసే ఈ ప్రమాదకరమైన ఇన్‌స్టంట్ లోన్ యాప్‌ల ఉచ్చులో పడితే మీరు మానసికంగా ఆర్థికంగా చిక్కుల్లో పడతారు. మరి ఈ ఉచ్చు నుండి మనం ఎలా తప్పించుకోవాలి? ఈ యాప్‌ల గురించిన నిజాలు, వాస్తవాలు తెలుసుకుందాం.
నేటి డిజిటల్ యుగంలో ఇన్‌స్టంట్ లోన్ యాప్‌లు చాలా మందికి ఆర్థిక అగాధాలుగా మారాయి. ఈ యాప్‌లు కేవలం కొన్ని నిమిషాల్లో, ఎలాంటి డాక్యుమెంట్స్ లేకుండా తక్షణ రుణాలు ఇస్తామని ఆకర్షిస్తాయి. మొదట్లో చిన్న మొత్తం ఇచ్చి, వినియోగదారులను నమ్మించి, ఆ తర్వాత అసలు కథ ప్రారంభిస్తాయి. మొదట కనిపించే తక్కువ వడ్డీ రేటు కేవలం భ్రమ మాత్రమే. అవి ప్రాసెసింగ్ ఫీజులు, ఆలస్య రుసుములు మరియు అనేక దాగి ఉన్న ఛార్జీల పేరుతో అసలు కంటే వడ్డీని రెట్టింపు చేస్తాయి.
ఈ యాప్‌లు తమ వడ్డీ రేటును వార్షికంగా కాకుండా, రోజువారీ లేదా వారపు ప్రాతిపదికన లెక్కిస్తాయి, ఇది వినియోగదారుకు తెలియకుండానే భారీ ఆర్థిక భారాన్ని మోపుతుంది. లోన్ తిరిగి చెల్లించడంలో ఒక్క రోజు ఆలస్యమైనా వారు వినియోగదారులకు మరియు వారి కాంటాక్ట్ లిస్ట్‌లోని వ్యక్తులకు వేధింపు కాల్స్, బెదిరింపు సందేశాలు పంపడం ప్రారంభిస్తారు. చాలా యాప్‌లు రుణం ఇచ్చేముందు, మీ ఫోన్‌లోని కాంటాక్ట్స్, గ్యాలరీ మరియు కాల్స్ ను యాక్సెస్ తీసుకుంటాయి. దీని ద్వారా వారు రుణ గ్రహీత యొక్క వ్యక్తిగత గోప్యతను ఉల్లంఘిస్తారు. కొన్ని సందర్భాల్ల, ఈ వేధింపులు మరియు ఒత్తిడి కారణంగా వినియోగదారులు ఆత్మహత్యలకు పాల్పడిన ఘటనలు కూడా చోటుచేసుకున్నాయి.
ఆర్థిక అవసరాలు ఎంత తీవ్రంగా ఉన్నప్పటికీ, నిబంధనలు లేని అనామక యాప్‌లను నమ్మి రుణాలు తీసుకోకూడదు. ఈ యాప్‌ల ఆకర్షణీయమైన ప్రకటనలకు దూరంగా ఉండండి. అధికారికంగా RBI గుర్తింపు పొందిన బ్యాంకులు లేదా NBFCల ను మాత్రమే ఆశ్రయించండి. ఈ చిన్న జాగ్రత్త మీ జీవితాన్ని, ఆర్థిక భవిష్యత్తును రక్షించుకోవడానికి చాలా కీలకం.
గమనిక: ఏదైనా లోన్ యాప్ ద్వారా మీరు వేధింపులకు గురైతే, వెంటనే సమీపంలోని సైబర్ క్రైమ్ పోలీసులకు లేదా RBI యొక్క కంప్లైంట్ పోర్టల్‌లో ఫిర్యాదు చేయండి.
