ఈరోజుల్లో ఎంతో మంది జ్వరం, జలుబు, తలనొప్పి రాగానే చాలామంది డాక్టర్ దగ్గరకు వెళ్లకుండా నేరుగా మెడికల్ షాపుకు వెళ్లి ట్యాబ్లెట్లు కొనేస్తుంటారు. అయితే మీరు కొనే కొన్ని మందుల ప్యాకెట్లపై ‘రెడ్ లైన్’, అలాగే మాత్రల మధ్యలో ఒక లైన్ ఉండటం ఎప్పుడైనా గమనించారా? వాటి వెనుక మన ప్రాణాలను కాపాడే ఒక పెద్ద సీక్రెట్ దాగి ఉంది. ఆ విశేషాలు ఏంటో ఇక్కడ తెలుసుకుందాం.
డాక్టర్ ఫీజు భయంతోనే సొంత వైద్యం: ఈ రోజుల్లో చిన్న సమస్య రాగానే డాక్టర్ దగ్గరకు వెళ్తే ఫీజుల రూపంలో రూ. 500 నుండి రూ. 1500 వరకు ఖర్చవుతోంది. ముఖ్యంగా మధ్యతరగతి కుటుంబాల వారు అంత స్థోమత లేక, మెడికల్ షాపులో రూ. 100 లేదా రూ. 200 లలోనే మందులు దొరుకుతుండటంతో నేరుగా కొనేస్తుంటారు. ఇక ఒకసారి వాడగా మిగిలిన మాత్రలను దాచి ఉంచి మరోసారి సమస్య వచ్చినప్పుడు వాడుతుంటారు. కానీ ఇలాంటి సమయంలో మందుల ప్యాకెట్పై ఉండే గుర్తులను గమనించడం చాలా అవసరం.
ట్యాబ్లెట్ స్ట్రిప్పై రెడ్ లైన్ సీక్రెట్ ఇదే: మందుల ప్యాకెట్పై ఉండే ఎరుపు రంగు గీత (రెడ్ లైన్) లేదా రెడ్ బాక్స్ గురించి భారత ప్రభుత్వ ఆరోగ్య, కుటుంబ సంక్షేమ మంత్రిత్వ శాఖ సోషల్ మీడియా ద్వారా ఒక ముఖ్యమైన అవగాహన కల్పించింది. ఈ రెడ్ లైన్ ఉద్దేశం ఏంటంటే.. ఆ మందులను కచ్చితంగా డాక్టర్ ప్రిస్క్రిప్షన్ లేకుండా వాడకూడదు. ఇక మెడికల్ షాపుల వారు కూడా డాక్టర్ రాసిస్తే తప్ప ఈ మందులను నేరుగా కస్టమర్లకు అమ్మకూడదు. వీటిని డాక్టర్ చెప్పిన మోతాదులోనే వాడాలి.
మాత్రలపై ఉండే గీత (Score Line) ఎందుకు?: కొన్ని ట్యాబ్లెట్ల మధ్యలో ఒక గీత ఉంటుంది దీనిని ‘స్కోర్ లైన్’ అంటారు. అవసరమైనప్పుడు డాక్టర్ లేదా ఫార్మసిస్ట్ సూచన మేరకు ఆ మాత్రను సమాన భాగాలుగా విరిచి వేసుకోవడానికి ఈ గీత ఉపయోగపడుతుంది. అయితే గీత ఉంది కదా అని అన్ని మాత్రలను విరవకూడదు. ఇక కొన్ని రకాల మాత్రలను అసలు విరవకుండా పూర్తిగా మింగాల్సి ఉంటుంది. అందుకే వీటిని సగానికి విరిచే ముందు నిపుణుల సలహా తీసుకోవడం మంచిది.
ఇక మందులు మనల్ని రోగాల నుండి కాపాడటానికి ఉపయోగపడతాయి, కానీ అవగాహన లేకుండా వాడితే అవే మన ప్రాణాల మీదకు తెస్తాయి. అందుకే ట్యాబ్లెట్ ప్యాకెట్పై ఉన్న రెడ్ లైన్ హెచ్చరికను గుర్తుంచుకోండి. సొంత వైద్యానికి దూరంగా ఉంటూ ఆరోగ్యాన్ని కాపాడుకోండి.
గమనిక: ఈ సమాచారం కేవలం ప్రభుత్వ ఆరోగ్య శాఖ తెలిపిన వివరాలు మరియు సాధారణ అవగాహన కోసం మాత్రమే అందించబడింది. ఎలాంటి అనారోగ్య సమస్యకైనా సొంతంగా మందులు వాడకుండా ఎల్లప్పుడూ అర్హత కలిగిన వైద్యుని సంప్రదించడం ఉత్తమం.
