ఈనాడు మనం ఎంతో ఇష్టంగా తినే ఆరెంజ్ రంగు క్యారెట్లు, తీపిగా ఉండే ఎర్రటి పుచ్చకాయలు ఒకప్పుడు అస్సలు ఇలా ఉండేవి కావు! వేల సంవత్సరాల క్రితం వీటి రంగు, రుచి, ఆకారం పూర్తిగా భిన్నంగా ఉండేవి. మానవులు చేసిన సుదీర్ఘ సాగు ప్రయోగాలు, జన్యు మార్పుల వల్లే ఇవి నేటి రుచికరమైన రూపాల్లోకి మారాయి. వినడానికి ఆశ్చర్యంగా ఉన్నా ఇది నిజం! ఈ రోజు మనం నిత్యం చూసే ఈ పండ్లు, కూరగాయల వెనుక ఉన్న ఆసక్తికరమైన చరిత్ర ఏంటో ఇప్పుడు తెలుసుకుందాం..
పర్పుల్ రంగులో ఉండే క్యారెట్లు: క్యారెట్లు మొదట్లో ఉదా (పర్పుల్), పసుపు లేదా తెలుపు రంగుల్లో ఉండేవి. 10వ శతాబ్దంలో ఆఫ్ఘనిస్తాన్, ఇరాన్ ప్రాంతాల్లో వీటిని తొలిసారి సాగు చేశారు. ఇక అప్పట్లో ఇవి సన్నగా, గట్టిగా, అనేక వేర్లతో కొద్దిగా చేదు రుచి కలిగి ఉండేవి. 16వ శతాబ్దం వరకు అసలు ఆరెంజ్ రంగు క్యారెట్లే లేవు.
డచ్ రైతుల ప్రయోగం – ఆరెంజ్ క్యారెట్: 17వ శతాబ్దంలో నెదర్లాండ్స్ రైతులు పసుపు క్యారెట్లలో వచ్చిన సహజ మార్పును గమనించి, తీపి ఎక్కువ ఉండేలా ఆరెంజ్ క్యారెట్లను పండించారు. ఇక నెదర్లాండ్స్కు చెందిన ‘హౌస్ ఆఫ్ ఆరెంజ్’ రాజవంశానికి గౌరవంగా ఈ రంగును ప్రోత్సహించినట్లు కూడా చెబుతారు. వీటిలో ‘బీటా-కెరోటిన్’ (విటమిన్-ఎ) ఎక్కువగా ఉండటంతో ఇవి ప్రపంచవ్యాప్తంగా ప్రసిద్ధి చెందాయి.
నీటి నిల్వ కోసం వాడిన పుచ్చకాయలు: దాదాపు 5,000 సంవత్సరాల క్రితం ఆఫ్రికాలోని సహారా ఎడారిలో అడవి మొక్కలుగా పెరిగే పుచ్చకాయలు చాలా చేదుగా ఉండేవి. ఇక లోపలి భాగం లేత తెలుపు లేదా ఆకుపచ్చ రంగులో ఉండేది. అప్పట్లో వీటిని కేవలం ఎడారి ప్రయాణాల్లో నీటి నిల్వ వనరుగా మాత్రమే ఉపయోగించేవారు.
ఎర్రటి తీపి పుచ్చకాయగా మార్పు: ఈజిప్షియన్లు, రోమన్లు శతాబ్దాల తరబడి చేసిన సాగు విధానాల వల్ల పుచ్చకాయ చేదు తగ్గి తీపి పెరిగింది. అందులోని ‘లైకోపీన్’ అనే పిగ్మెంట్ వల్ల లోపలి భాగం ఎరుపు రంగులోకి మారింది. ఇక 17వ శతాబ్దపు ప్రసిద్ధ పెయింటింగ్స్లో ఇప్పటికీ తక్కువ ఎరుపు గుజ్జు, ఎక్కువ విత్తనాలు ఉన్న పుచ్చకాయలను చూడవచ్చు.
ఇక మనం రోజూ తినే క్యారెట్, పుచ్చకాయలు ఈనాటి రూపాల్లోకి రావడానికి రైతుల శతాబ్దాల కృషి, పరిశోధనలే కారణం. ప్రకృతి అందించిన పంటలను తమ అవసరాలకు తగ్గట్లు మార్చుకోవడంలో మానవ మేధస్సు ఎంత గొప్పదో చెప్పడానికి ఈ పంటల చరిత్రే నిదర్శనం.
గమనిక: ఈ కథనంలో అందించిన వివరాలు చారిత్రక ఆధారాలు, వ్యవసాయ పరిశోధనలు మరియు వృక్షశాస్త్ర నిపుణుల కథనాల ఆధారంగా కేవలం పాఠకుల అవగాహన కోసం అందించబడినవి.
