ఉక్రెయిన్‌పై దాడి చేసి రష్యా ఆక్రమించుకున్న ప్రదేశాలను తమ దేశంలో కలుపుకునేందుకు రష్యా ప్రయత్నాలు మొదలుపెట్టింది. దానికోసం ఇవాళ్టి నుంచి రెఫరెండం షురూ మొదలుపెట్టింది. ఈ ప్రాంతాలను రష్యాలో విలీనం చేసుకోవడానికి స్థానికులు సానుకూలత వ్యక్తం చేసినట్లు ప్రపంచానికి చూపేందుకు ఈ చర్యను చేపట్టినట్లు తెలుస్తోంది. ఈ రెఫరెండం ఈనెల 27న ముగియనుందని వార్తాసంస్థల్లో కథనాలు వెలువడుతున్నాయి.
తూర్పు వైపు దొనెట్స్క్‌, లుహాన్స్క్‌.. దక్షిణం వైపు ఖేర్సన్‌, జపోరిజియాల్లో రష్యా సైన్యం పర్యవేక్షణలో దీనిని నిర్వహిస్తున్నారు. ఉక్రెయిన్ సహా పశ్చిమ దేశాలు ఈ చర్యను భూకబ్జాగా అభివర్ణిస్తున్నాయి. ఇదొక సిగ్గుమాలిన చర్య అని అమెరికా విదేశాంగ మంత్రి ఆంటోనీ బ్లింకెన్‌ మండిపడ్డారు. దాదాపు 3,00,000 మంది రిజర్వు దళాలను సమీకరిస్తామని రష్యా అధ్యక్షుడు పుతిన్‌ వెల్లడించిన రోజుల వ్యవధిలోనే ప్రజాభిప్రాయ సేకరణ నిర్వహించడం గమనార్హం.
