తల్లి కానిస్టేబుల్ పరీక్ష రాసేందుకు వెళ్లింది. పిల్లలను ఇంట్లోనే ఉంచింది. తల్లికి పరిచయమున్న ఓ వ్యక్తి ఆమె పరీక్ష రాసేందుకు వెళ్లాక వారి ఇంటికి వెళ్లాడు. ఆ పిల్లల్లో పెద్ద కుమార్తెను ఏదో మాయమాటలు చెప్పి తన వెంట తీసుకెళ్లాడు. ఓ అద్దె నివాసానికి తీసుకెళ్లి ఆ బాలికపై అత్యాచారం చేశాడు. తీవ్ర రక్తస్రావం కావడంతో భయపడి బాలికను ఆస్పత్రికి తరలించాడు. ఈనెల 28న నిజామాబాద్ జిల్లా ఆర్మూర్ మండలంలోని ఓ గ్రామంలో చోటుచేసుకున్న ఈ ఘటన ఆలస్యంగా వెలుగులోకి వచ్చింది.
ఈ నెల 28న జరిగిన కానిస్టేబుల్ రాత పరీక్ష రాసేందుకు బాధితురాలి తల్లి వెళ్లింది. ఈ క్రమంలోనే ఆమెతో సన్నిహితంగా ఉంటున్న వార్డు మెంబర్ ఆమె తొమ్మిదేళ్ల పెద్ద కుమార్తెను పట్టణంలోని ఓ అద్దె నివాసానికి తీసుకువెళ్లి అఘాయిత్యానికి పాల్పడ్డాడు. బాలికకు తీవ్ర రక్తస్రావం కావడంతో నిజామాబాద్ జిల్లా ప్రభుత్వ ఆసుపత్రికి తరలించాడు.
సిబ్బందికి తల్లి ఫోన్ నెంబర్ను అందజేసి అక్కడి నుంచి పరారయ్యాడు. ప్రస్తుతం బాధిత బాలిక పరిస్థితి విషమంగా ఉన్నట్లు సమాచారం. మరోవైపు ఘటనపై ఎలాంటి ఫిర్యాదు అందలేదని ఆర్మూర్ పోలీసులు తెలిపారు.
