ఈ లోకంలో అత్యంత ఆకర్షణీయమైన అంతుచిక్కని రూపం ఏదైనా ఉందంటే అది నిస్సందేహంగా పరమశివుడిదే. జటాజూటం, మెడలో పాము, శరీరం నిండా విభూతి. ఆ బూడిదను చూసి కొందరు ముక్కుముడేస్తారు మరికొందరు అత్యంత పవిత్రంగా ఆరాధిస్తారు. శివుడు తన శరీరమంతా ఈ భస్మాన్ని పూసుకోవడం వెనుక ఏదో ఆధ్యాత్మిక శక్తి, లోతైన జీవిత సత్యం దాగి ఉంది. కేవలం అలంకరణ కాదు అదొక అద్భుతమైన జీవిత పాఠం. అసలు ఈ భస్మం అంటే ఏమిటి? దాన్ని శివుడు ఎందుకు ధరించాడో తెలుసుకుందాం.
ఆధ్యాత్మికంగా చూస్తే భస్మం (విభూతి) అనేది సృష్టి యొక్క అంతిమ సత్యాన్ని తెలియజేస్తుంది. ఈ విశ్వంలో ఏదైనా సరే, అది ఎంత గొప్పదైనా అందమైనదైనా, చివరికి మిగిలేది బూడిద మాత్రమే. శివుడు స్మశానవాసి. ఆయన ఎప్పుడూ లయకారుడి పాత్రను పోషిస్తాడు. ప్రళయం తరువాత సమస్తం నశించిపోయి, మిగిలిన శుద్ధమైన పదార్థమే ఈ బూడిద. శివుడు దీనిని ధరించడం ద్వారా “ఈ భౌతిక దేహం సంపద, పేరు ప్రతిష్టలు అన్నీ తాత్కాలికమే. తుది సత్యం అశాశ్వతమైనది, శాశ్వతమైనది కేవలం ఆత్మ మాత్రమే” అనే సందేశాన్ని మనకు ఇస్తున్నాడు. ఈ భస్మం వైరాగ్యానికి, వదిలేయడానికి సంకేతం. మనం దేనిని పట్టుకోకూడదు, దేనికీ అతుక్కుపోకూడదు అని శివుడు తన రూపం ద్వారా బోధిస్తున్నాడు.
అంతేకాక భస్మానికి అద్భుతమైన ఔషధ గుణాలు ఉన్నాయి. ఇది చర్మ వ్యాధులను నివారించడంలో, శరీరాన్ని చల్లగా ఉంచడంలో సహాయపడుతుంది. శివుడు ఎప్పుడూ కఠినమైన తపస్సులో ఉంటాడు ఆయన ధరించే విభూతి ఆయన శరీరాన్ని బాహ్య శక్తుల నుండి, ముఖ్యంగా అధిక ఉష్ణోగ్రత నుండి రక్షిస్తుంది అని కొందరి నమ్మకం. ఈ భస్మం కేవలం బూడిద కాదు అది అగ్నిలో సంపూర్ణంగా దహనం చేయబడిన పదార్థం. అంటే అది కల్మషాలను అహంకారాన్ని పూర్తిగా తగులబెట్టి పవిత్రతను మాత్రమే మిగుల్చుతుందని అర్థం. శివుడు విభూతిని ధరించడం అంటే ఆయన సమస్త కల్మషాలకు అతీతుడు అని ఆయన పవిత్రతకు నిలువెత్తు నిదర్శనం అని మనం గ్రహించాలి. ఇది కేవలం ఒక ఆచారంగా కాకుండా జీవితంలో విముక్తిని శుద్ధిని కోరుకునే వారికి ఒక గొప్ప మార్గదర్శకం.
శివుడి విభూతి ధారణ అనేది ఒక నిరంతర జ్ఞాపకం. మన జీవిత లక్ష్యం కేవలం భౌతిక సుఖాలు కాదు అంతిమ సత్యాన్ని, మన నిజమైన స్వరూపాన్ని తెలుసుకోవడమే అని ఈ బూడిద మౌనంగా చెబుతుంది. ప్రతిసారీ శివుడిని విభూతితో చూసినప్పుడు మనం ఆ శాశ్వతత్వాన్ని, వైరాగ్యాన్ని స్ఫూర్తిగా తీసుకోవాలి. ఈ జీవిత సత్యాన్ని అర్థం చేసుకున్నప్పుడే, మనం నిజమైన శివతత్వాన్ని తెలుసుకుంటాం.
