సంక్రాంతి వచ్చిందంటే తెలుగు లోగిళ్ళలో పండగ సందడి మొదలవుతుంది. మూడు రోజుల పాటు పిల్ల పెద్ద అందరు ఉల్లాసంగా జరుపుకునే ఈ పండుగ లో మొదటి రోజైన భోగి అంటేనే కొత్త ఉత్సాహం. తెల్లవారుజామున వేసే భోగి మంటలు, పిల్లలపై కురిపించే భోగి పళ్లు.. ఈ వేడుకల వెనుక కేవలం సంప్రదాయం మాత్రమే కాదు గొప్ప పురాణ నేపథ్యం కూడా ఉంది. అసలు ఈ పండుగను ‘భోగి’ అని ఎందుకు అంటారు? ఇంద్రుడికి, శ్రీకృష్ణుడికి ఈ రోజుతో ఉన్న సంబంధం ఏమిటి? మన ఆచారాల వెనుక ఉన్న ఆ ఆసక్తికరమైన ఆధ్యాత్మిక రహస్యాలను తెలుసుకుందాం.
పురాణాల ప్రకారం: భోగి పండుగ పుట్టుక వెనుక శ్రీకృష్ణ పరమాత్ముని లీల ప్రధానంగా కనిపిస్తుంది. ఒకప్పుడు గోకులంలోని ప్రజలు వర్షాల కోసం ఇంద్రుడిని పూజించేవారు. అయితే అహంకారంతో ఉన్న ఇంద్రుడికి బుద్ధి చెప్పాలని కృష్ణుడు భావించి, ప్రకృతిని ప్రసాదించే గోవర్ధన గిరిని పూజించమని ప్రజలకు చెబుతాడు.
ఆగ్రహించిన ఇంద్రుడు ప్రళయాన్ని సృష్టించగా, కృష్ణుడు తన చిటికెన వేలితో గోవర్ధన పర్వతాన్ని ఎత్తి ప్రజలను కాపాడతాడు. చివరకు తన తప్పు తెలుసుకున్న ఇంద్రుడు కృష్ణుడిని శరణు వేడగా, ఆ గర్వ భంగానికి గుర్తుగా, ఇంద్రుడిని ‘భోగి’ (భోగాలను ఇచ్చేవాడు) గా పూజించే సంప్రదాయం మొదలైందని చెబుతారు.
మరో కథ : భోగి మంటలు వేయడం వెనుక మనలోని పాత ఆలోచనలను, అరిషడ్వర్గాలను దహనం చేయాలనే అంతరార్థం ఉంది. దేవుడిపై భక్తితో గోదాదేవి చేసిన తపస్సు ఫలించి, ఈ రోజే ఆమె రంగనాథునిలో ఐక్యమైందని పురాణాలు చెబుతున్నాయి. అందుకే ఈ రోజున ఇంటి ముందర రంగవల్లులు వేసి, గొబ్బెమ్మలతో అలంకరిస్తారు.
ఇక చిన్నపిల్లల తలపై భోగి పళ్లు (రేగు పళ్లు) పోయడం వెనుక ఉన్న ఉద్దేశ్యం ఏమిటంటే.. రేగు పండును ‘బదరీ’ ఫలం అంటారు. ఇది సూర్య భగవానుడికి ప్రీతిపాత్రమైనది. పిల్లలపై వీటిని పోయడం వల్ల వారిపై ఉన్న దృష్టి దోషం తొలగిపోవడమే కాక, నారాయణుని ఆశీస్సులు లభిస్తాయని పెద్దల నమ్మకం.
ముగింపుగా చెప్పాలంటే, భోగి పండుగ మనకు ఇచ్చే సందేశం ఒక్కటే,పాతను వదిలి కొత్త దనానికి స్వాగతం పలకడం. ఇంద్రుని గర్వ భంగం ద్వారా మనలోని అహంకారాన్ని వీడాలని, గోదాదేవి కథ ద్వారా భక్తి మార్గంలో నడవాలని ఈ పండుగ మనల్ని ప్రోత్సహిస్తుంది. కేవలం సంబరాలకే పరిమితం కాకుండా ఈ ఆచారాల వెనుక ఉన్న పరమార్థాన్ని గ్రహించినప్పుడే పండుగకు సంపూర్ణత లభిస్తుంది. పంటలతో ఇంటి ముందరి ముగ్గులతో కళకళలాడే ఈ భోగి, మన అందరి జీవితాల్లో సరికొత్త వెలుగులు నింపాలని కోరుకుందాం..
గమనిక: భోగి మంటల్లో పాత వస్తువులను తగులబెట్టే క్రమంలో ప్లాస్టిక్, టైర్లు వంటి పర్యావరణానికి హాని చేసే పదార్థాలను వేయకండి. మన సంప్రదాయం పర్యావరణాన్ని గౌరవించమని చెబుతుంది కాబట్టి కేవలం సహజ సిద్ధమైన కట్టెలు, పిడకలను మాత్రమే వాడటం ఉత్తమం.
