మనం రోజూ తినే ఆహారంలో నూనెది కీలక పాత్ర. కానీ, మార్కెట్లో దొరికే తళతళలాడే ప్యాకెట్ నూనెలు వాడాలా? లేక మన తాతల కాలం నాటి గానుగ నూనెలకు ప్రాధాన్యత ఇవ్వాలా? అనే అయోమయం అందరిలోనూ ఉంది. రిఫైన్డ్ ఆయిల్స్ తయారీలో వాడే రసాయనాలు, గానుగ నూనెలోని సహజ గుణాల మధ్య ఉన్న తేడాలేమిటి? నిజంగా మన గుండెకు, ఆరోగ్యానికి ఏది రక్షణ కవచంలా పనిచేస్తుంది? ఈ సందేహాలన్నిటికీ సమాధానం తెలియాలంటే ఇది చూడండి.
గానుగ నూనె అంటే ఏమిటి?: గానుగ నూనె (Cold Pressed Oil) అంటే ఎటువంటి రసాయనాలు కలపకుండా, కేవలం గింజలను నొక్కడం ద్వారా తీసే నూనె. పాతకాలంలో ఎద్దుల సహాయంతో చెక్క గానుగ ద్వారా నూనె తీసేవారు. ఇప్పుడు విద్యుత్ యంత్రాలు వచ్చినా, తయారీ విధానం మాత్రం మారలేదు. ఇందులో గింజలని వేడి చేయరు, కాబట్టి నూనెలోని సహజమైన పోషకాలు, విటమిన్లు మరియు సువాసన అలాగే ఉంటాయి.
ప్యాకెట్ నూనె :మనం వాడే ప్యాకెట్ నూనెలు ‘రిఫైనింగ్’ ప్రక్రియ ద్వారా తయారవుతాయి. నూనె గింజల నుండి గరిష్టంగా నూనెను తీయడానికి వీటిని అధిక ఉష్ణోగ్రత వద్ద వేడి చేస్తారు. ఆ సమయంలో నూనెలోని జిగురు, వాసన పోగొట్టడానికి ‘హెక్సేన్’ వంటి రసాయనాలను కలుపుతారు. దీనివల్ల నూనె పారదర్శకంగా మారుతుంది కానీ, అందులోని సహజ పోషకాలు చాలా వరకు నశించిపోతాయి.
ఆరోగ్యపరంగా తేడాలు: పోషక విలువలు: గానుగ నూనెలో విటమిన్ E, యాంటీ ఆక్సిడెంట్లు పుష్కలంగా ఉంటాయి. రిఫైన్డ్ ఆయిల్స్ లో ఇవి శూన్యం.
గుండె ఆరోగ్యం: రిఫైన్డ్ ఆయిల్స్ లో ఉండే ట్రాన్స్ ఫ్యాట్స్ గుండె ధమనులలో కొవ్వు పేరుకుపోయేలా చేస్తాయి. గానుగ నూనెలో ఉండే మంచి కొవ్వులు (HDL) గుండెకు మేలు చేస్తాయి.
వాడకం: గానుగ నూనె చిక్కగా ఉంటుంది కాబట్టి వంటకు తక్కువ పరిమాణంలో సరిపోతుంది. రిఫైన్డ్ ఆయిల్ నీళ్లలా ఉంటుంది కాబట్టి తెలియకుండానే ఎక్కువ వాడేస్తాం.
దేనిని ఎంచుకోవాలి?: అత్యధిక వేడి అవసరమయ్యే డీప్ ఫ్రై వంటి వంటలకు రిఫైన్డ్ ఆయిల్ వాడుతుంటారు (ఎందుకంటే దీని స్మోక్ పాయింట్ ఎక్కువ). కానీ, నిత్యం మనం చేసుకునే కూరలు, తాలింపులకు గానుగ నూనె ఉత్తమమైనది. గానుగ నూనె ధర కాస్త ఎక్కువ అనిపించినా, అది మనకు ఇచ్చే ఆరోగ్యం ముందు ఆ ఖర్చు చాలా తక్కువే అని చెప్పాలి.
