వంటింట్లో ఉప్పు లేనిదే ఏ వంటకూ రుచి రాదు. అయితే, పాతకాలపు తెల్లటి ఉప్పు వాడాలా? లేక ఈ మధ్య ట్రెండీగా మారిన హిమాలయన్ పింక్ సాల్ట్ వాడాలా? అనే సందేహం చాలా మందిలో ఉంది. పింక్ సాల్ట్ వాడితే రోగాలు రావని కొందరు, అదంతా ఉత్తదే అని మరికొందరు వాదిస్తుంటారు. అసలు ఈ రెండింటి మధ్య ఉన్న తేడా ఏంటి? సైన్స్ ఏం చెబుతోంది? మీ ఆరోగ్యానికి ఏది నిజమైన నేస్తమో ఇప్పుడు వివరంగా తెలుసుకుందాం..
సాధారణ ఉప్పు – మన సంప్రదాయ నేస్తం: మనం రోజూ వాడే తెల్ల ఉప్పు (Table Salt) సముద్రపు నీటి నుండి వస్తుంది. దీనిని శుద్ధి చేసే ప్రక్రియలో మురికిని తొలగిస్తారు. దీనివల్ల ఇది చూడటానికి తెల్లగా, పొడిపొడిగా ఉంటుంది. దీనిలోని అతిపెద్ద ప్లస్ పాయింట్ ‘అయోడిన్’ థైరాయిడ్ సమస్యలు రాకుండా ఉండటానికి ప్రభుత్వం ఉప్పులో అయోడిన్ను తప్పనిసరి చేసింది. కాబట్టి సాధారణ ఉప్పు మనకు అవసరమైన అయోడిన్ను సులభంగా అందిస్తుంది.
పింక్ సాల్ట్ – ఖనిజాల గని?: హిమాలయన్ పింక్ సాల్ట్ పాకిస్తాన్లోని గనుల నుండి లభిస్తుంది. దీనికి ఆ రంగు రావడానికి కారణం అందులో ఉండే ఐరన్ ఆక్సైడ్. సాధారణ ఉప్పుతో పోలిస్తే ఇందులో పొటాషియం, మెగ్నీషియం, కాల్షియం వంటి ఖనిజాలు కొంచెం ఎక్కువగా ఉంటాయి. అయితే, ఆ ఖనిజాలు చాలా తక్కువ మొత్తంలో ఉండటం వల్ల, కేవలం వాటి కోసమే పింక్ సాల్ట్ వాడటం వల్ల శరీరానికి వచ్చే పెద్ద లాభం ఏమీ లేదని నిపుణులు చెబుతుంటారు.
సోడియం విషయంలో తేడా ఉందా?:చాలా మంది పింక్ సాల్ట్లో సోడియం తక్కువగా ఉంటుందని భ్రమపడుతుంటారు. కానీ వాస్తవానికి రెండింటిలోనూ సోడియం క్లోరైడ్ దాదాపు ఒకేలా ఉంటుంది. బీపీ ఉన్నవారు పింక్ సాల్ట్ ఎంతైనా తినొచ్చని అనుకుంటే అది పొరపాటే. ఇక ఏ ఉప్పు అయినా అతిగా తింటే రక్తపోటు పెరగడం ఖాయం.పింక్ సాల్ట్ కొంచెం గరుకుగా ఉండటం వల్ల స్పూన్ కొలతలో సోడియం తక్కువగా అనిపించవచ్చు కానీ, బరువు ప్రకారం చూస్తే రెండు సమానమే.
రుచి మరియు వినియోగం: రుచి విషయానికి వస్తే పింక్ సాల్ట్ కొంచెం భిన్నంగా, సహజంగా ఉంటుంది. అందుకే సలాడ్లు, పండ్లు లేదా ప్రత్యేకమైన వంటకాల్లో దీనిని వాడుతుంటారు. అయితే, ఇందులో అయోడిన్ ఉండదు కాబట్టి, పూర్తిగా పింక్ సాల్ట్ మీదనే ఆధారపడితే అయోడిన్ లోపం వచ్చే ప్రమాదం ఉంది. కాబట్టి, తెలివైన పని ఏమిటంటే.. రెండింటినీ బ్యాలెన్స్ చేస్తూ వాడటం లేదా అయోడిన్ అవసరాలను ఇతర ఆహారాల ద్వారా భర్తీ చేసుకోవడం.
చివరికి తేలిందేంటంటే.. పింక్ సాల్ట్ అనేది కేవలం ఒక సహజమైన ప్రత్యామ్నాయం మాత్రమే తప్ప, అద్భుతాలు చేసే మందు కాదు. మీరు రుచి కోసం కెమికల్స్ లేని ఉప్పు కావాలనుకుంటే పింక్ సాల్ట్ వాడవచ్చు. కానీ ఆరోగ్యంగా ఉండాలంటే ఉప్పు రకం కంటే మీరు ఎంత మొత్తం (Quantity) వాడుతున్నారనేదే ముఖ్యం. తక్కువ ఉప్పు.. ఎక్కువ ఆరోగ్యం!
