ఇల్లు కట్టుకునేటప్పుడు మనం హాల్, బెడ్రూమ్స్ గురించి ఆలోచించినంతగా బాత్రూమ్ తలుపుల గురించి పట్టించుకోం. కానీ, వాస్తు ప్రకారం బాత్రూమ్ తలుపు ఏ దిశలో ఉందనేది మన ఇంటి ప్రశాంతతను, ఆర్థిక పరిస్థితిని శాసిస్తుందని మీకు తెలుసా? తప్పుడు దిశలో తలుపు ఉంటే నెగటివ్ ఎనర్జీ ఇంట్లోకి వచ్చే అవకాశం ఉంది. అందుకే, ఏ దిశలో తలుపు ఉంటే అదృష్టమో, ఏ దిశలో ఉండకూడదో ఇప్పుడు తెలుసుకుందాం..
సరైన దిశ ఏది?: వాస్తు నిపుణుల ప్రకారం, బాత్రూమ్ లేదా టాయిలెట్ తలుపులు ఎప్పుడూ ఉత్తరం లేదా తూర్పు దిశల్లో ఉండటం చాలా శ్రేయస్కరం. ఈ దిశల నుండి సానుకూల శక్తి ఇంట్లోకి వస్తుంది కాబట్టి, ఇక్కడ తలుపులు ఉంటే ఆరోగ్యపరంగా కూడా మంచిది. ఇక ఒకవేళ వీలు పడకపోతే పశ్చిమ దిశను కూడా ఎంచుకోవచ్చు.
ఈ దిశల్లో అస్సలు వద్దు: బాత్రూమ్ తలుపులు దక్షిణ దిశలో ఉండటం అంత మంచిది కాదని వాస్తు చెబుతోంది. దక్షిణం యమస్థానంగా భావిస్తారు కాబట్టి, ఆ దిశలో బాత్రూమ్ ద్వారం ఉంటే ఇంట్లో అనారోగ్య సమస్యలు లేదా ఆర్థిక ఇబ్బందులు తలెత్తే అవకాశం ఉంటుంది. ఇక అలాగే నైరుతి మూల కూడా తలుపుల కోసం వాడకపోవడమే మంచిది.
తలుపులు ఎప్పుడూ ఎలా ఉండాలి?: మనం చేసే పెద్ద తప్పు ఏమిటంటే, బాత్రూమ్ ఉపయోగించిన తర్వాత తలుపులను తెరిచే ఉంచుతాం. ఇలా చేయడం వల్ల బాత్రూమ్లోని ప్రతికూల శక్తి ఇల్లంతా వ్యాపిస్తుంది. అందుకే వాస్తు ప్రకారం బాత్రూమ్ తలుపులు ఎప్పుడూ మూసి ఉంచాలి. ఇక అలాగే, బెడ్రూమ్కు నేరుగా ఎదురుగా బాత్రూమ్ తలుపు ఉండకుండా చూసుకోవడం ఉత్తమం.
మెటీరియల్ కూడా ముఖ్యం: బాత్రూమ్ తలుపుల విషయంలో కేవలం దిశ మాత్రమే కాదు, అది దేనితో తయారైందనేది కూడా ముఖ్యం. వీలైనంత వరకు చెక్క తలుపుల కంటే నాణ్యమైన ప్లాస్టిక్ లేదా పీవీసీ (PVC) తలుపులు వాడటం మంచిది. ఎందుకంటే నీటి వల్ల తలుపులు పాడవకుండా ఉండటమే కాకుండా, వాస్తు రీత్యా కూడా ఇవి అనుకూలంగా ఉంటాయి.
గమనిక: ఈ సమాచారం సాధారణ వాస్తు సూత్రాల ఆధారంగా ఇవ్వబడింది. మీ ఇంటి నిర్మాణాన్ని బట్టి పూర్తి వివరాల కోసం నిపుణులైన వాస్తు సిద్ధాంతిని సంప్రదించడం ఉత్తమం.
