సాధారణంగా ఇంటి బాధ్యతలు, ఆఫీస్ పనుల ఒత్తిడిలో మహిళలు తమ ఆరోగ్యాన్ని నిర్లక్ష్యం చేస్తుంటారు. ముఖ్యంగా గుండె ఆరోగ్యం విషయంలో అశ్రద్ధ వహిస్తే అది భవిష్యత్తులో పెద్ద ప్రమాదాలకు దారితీయవచ్చు. మారుతున్న జీవనశైలి వల్ల ప్రస్తుతం మహిళల్లో కూడా గుండెపోటు సమస్యలు పెరుగుతున్నాయి. అందుకే, మన గుండెను పదిలంగా ఉంచుకోవడానికి పాటించాల్సిన ఆ 5 ముఖ్యమైన అలవాట్లు ఏంటో ఇప్పుడు తెలుసుకుందాం..
ప్రతిరోజూ వ్యాయామం ముఖ్యం: రోజూ కనీసం 30 నిమిషాల పాటు నడక, యోగా లేదా ఏదైనా శారీరక శ్రమ చేయడం వల్ల గుండె పనితీరు మెరుగుపడుతుంది. వ్యాయామం చేయడం వల్ల రక్త ప్రసరణ సాఫీగా జరిగి, గుండె కండరాలు బలంగా తయారవుతాయి. ఇది కేవలం బరువు తగ్గడానికే కాదు, ఒత్తిడిని తగ్గించడానికి కూడా బాగా పని చేస్తుంది.
ఆహారంలో మార్పులు చేసుకోండి: మనం తినే ఆహారమే మన గుండెకు శ్రీరామరక్ష. నూనెలో వేయించిన పదార్థాలు, జంక్ ఫుడ్ తగ్గించి, ఆకుకూరలు, పండ్లు, తృణధాన్యాలు ఎక్కువగా తీసుకోవాలి. ముఖ్యంగా ఉప్పును తగ్గించడం వల్ల రక్తపోటు (BP) అదుపులో ఉంటుంది. ఇక వారానికి రెండు సార్లు బాదం, వాల్నట్స్ వంటి డ్రై ఫ్రూట్స్ తీసుకోవడం గుండెకు చాలా మంచిది.
నిద్ర మరియు ఒత్తిడి నిర్వహణ: మహిళలు ఇంటి పనుల వల్ల తరచూ నిద్రను త్యాగం చేస్తుంటారు. కానీ రోజుకు 7 నుండి 8 గంటల గాఢ నిద్ర గుండెకు ఎంతో అవసరం. నిద్ర లేకపోతే హార్మోన్ల అసమతుల్యత ఏర్పడి గుండెపై భారం పడుతుంది. ఇక అలాగే, చిన్న చిన్న విషయాలకు ఆందోళన పడకుండా మెడిటేషన్ చేయడం వల్ల మనసు ప్రశాంతంగా ఉండి గుండె ఆరోగ్యంగా ఉంటుంది.
నిరంతర ఆరోగ్య పరీక్షలు: చాలామందికి ఏదైనా సమస్య వస్తేనే డాక్టర్ దగ్గరకు వెళ్లే అలవాటు ఉంటుంది. కానీ 30 ఏళ్లు దాటిన మహిళలు క్రమం తప్పకుండా బీపీ, షుగర్, కొలెస్ట్రాల్ పరీక్షలు చేయించుకోవాలి. ఇక ఈ సమస్యలను ముందుగానే గుర్తిస్తే సరైన జాగ్రత్తలు తీసుకుని గుండె జబ్బుల నుండి తప్పించుకోవచ్చు.
సరైన బరువును మెయింటైన్ చేయడం: అధిక బరువు, ముఖ్యంగా పొట్ట భాగంలో కొవ్వు పెరగడం గుండెకు పెద్ద శత్రువు. బాడీ మాస్ ఇండెక్స్ (BMI) అదుపులో ఉండేలా చూసుకోవాలి. బరువు పెరిగే కొద్దీ గుండె రక్తాన్ని పంప్ చేయడానికి ఎక్కువ కష్టపడాల్సి వస్తుంది, ఇది భవిష్యత్తులో గుండె సమస్యలకు దారితీస్తుంది.
గమనిక: ఈ సమాచారం కేవలం అవగాహన కోసం మాత్రమే. మీకు ఇప్పటికే ఏదైనా ఆరోగ్య సమస్యలు ఉంటే లేదా కొత్తగా వ్యాయామం మొదలుపెట్టే ముందు వైద్యులను సంప్రదించడం మంచిది.
