మెనోపాజ్ వల్ల చూపు మారుతుందా? నిపుణులు చెప్పే నిజాలు

మనలో చాల మందికి మెనోపాజ్ అనగానే కేవలం హార్మోన్ల మార్పులు, మూడ్ స్వింగ్స్ మాత్రమే గుర్తొస్తాయి. కానీ, ఈ దశలో మహిళల చూపు కూడా మారుతుందన్న విషయం మీకు తెలుసా? శరీరంలో ఈస్ట్రోజెన్ లెవల్స్ తగ్గడం వల్ల కళ్ళలో మంటలు, డ్రైనెస్ వంటి సమస్యలు మొదలవుతాయి. అసలు మెనోపాజ్ సమయంలో కళ్ళ ఆరోగ్యానికి సంబంధించి నిపుణులు ఏమంటున్నారు? ఏ జాగ్రత్తలు తీసుకోవాలో ఇప్పుడు చదివి తెలుసుకోండి.

హార్మోన్ల ఆట.. కళ్ళపై ప్రభావం: మెనోపాజ్ సమయంలో శరీరంలో ‘ఈస్ట్రోజెన్’ అనే హార్మోన్ తగ్గిపోతుంది. దీనివల్ల కళ్ళలోని టియర్స్ (కన్నీళ్లు) ఉత్పత్తి తగ్గుతుంది. ఇక ఫలితంగా కళ్ళు పొడిబారడం (Dry Eyes) మొదలవుతుంది. దీనివల్ల కళ్లలో ఏదో నలుసు పడినట్టు అనిపించడం, చికాకు కలగడం సహజం.

విజన్ లో వచ్చే మార్పులు :వయసుతో పాటు వచ్చే మార్పులే కాకుండా, మెనోపాజ్ వల్ల కంటి లోపల ఉండే లెన్స్ ఆకారం స్వల్పంగా మారే అవకాశం ఉంది. దీనివల్ల దృష్టి మసకబారడం (Blurred Vision) లేదా దగ్గరి వస్తువులు సరిగ్గా కనిపించకపోవడం జరగవచ్చు. ఇక అందుకే ఈ సమయంలో కొత్తగా ఐ గ్లాసెస్ (Spectacles) అవసరం పడవచ్చు.

గ్లాకోమా మరియు క్యాటరాక్ట్ రిస్క్: హార్మోన్ల ఇన్ బ్యాలెన్స్ వల్ల కంటి లోపల ఒత్తిడి (Eye Pressure) పెరిగే ఛాన్స్ ఉంటుంది. ఇది గ్లాకోమా వంటి సీరియస్ సమస్యలకు దారితీయవచ్చు. అలాగే కొంతమందిలో క్యాటరాక్ట్ (కంటి శుక్లాలు) వచ్చే వేగం కూడా పెరగవచ్చని నిపుణులు చెబుతున్నారు. అందుకే రెగ్యులర్ చెకప్స్ చాలా అవసరం.

లైఫ్ స్టైల్ మార్పులతో చెక్ పెట్టండి : ఈ సమస్యల నుంచి ఉపశమనం పొందాలంటే కొన్ని చిన్న టిప్స్ పాటించాలి. కంప్యూటర్ లేదా ఫోన్ వాడేటప్పుడు తరచుగా కళ్లు ఆర్పుతూ ఉండాలి. ఒమేగా-3 ఫ్యాటీ యాసిడ్స్ ఉన్న ఆహారం (చేపలు, వాల్‌నట్స్) తీసుకోవడం వల్ల కంటి డ్రైనెస్ తగ్గుతుంది. ఇక తగినంత నీరు తాగుతూ బాడీని హైడ్రేటెడ్‌గా ఉంచుకోవాలి.

మెనోపాజ్ అనేది ప్రతి మహిళ జీవితంలో ఒక సహజమైన దశ. అయితే ఈ సమయంలో కేవలం ఇతర ఆరోగ్య సమస్యలనే కాకుండా, కళ్ళను కూడా జాగ్రత్తగా చూసుకోవాలి. చిన్న మార్పు కనిపించినా నిర్లక్ష్యం చేయకుండా ఐ స్పెషలిస్ట్‌ను సంప్రదించడం వల్ల మీ చూపును పదిలపరుచుకోవచ్చు.

పైన ఇచ్చిన సమాచారం కేవలం అవగాహన కోసం మాత్రమే. మీకు కంటికి సంబంధించి ఏవైనా తీవ్రమైన సమస్యలు ఉంటే వెంటనే నిపుణులైన కంటి వైద్యుడిని సంప్రదించి, వారి సలహా మేరకు మాత్రమే చికిత్స తీసుకోండి.