ఉరుకుల పరుగుల జీవితం, ఆఫీసు ఒత్తిడి, చేతిలో ఎప్పుడూ విడవని మొబైల్ ఫోన్.. వెరసి నేటి కాలంలో ‘నిద్ర’ అనేది ఒక అపురూపమైన వస్తువులా మారిపోయింది. పక్క మీదకు వెళ్లినా గంటల తరబడి కళ్లు మూతపడక, తెల్లవారేసరికి నీరసంతో రోజంతా ఇబ్బంది పడేవారు ఎందరో! అయితే, నిద్ర కోసం మందులు వాడాల్సిన పని లేదు. మన దైనందిన అలవాట్లలో కొన్ని చిన్నపాటి మార్పులు చేసుకుంటే చాలు, హాయిగా జోలపాట పాడినట్టు నిద్ర పడుతుందంటున్నారు ఆరోగ్య నిపుణులు. ఆ రహస్యాలేంటో ఇప్పుడు చూద్దాం.
సమయపాలనతో ఆరోగ్యం మీ సొంతం: మనం చేసే అతి పెద్ద తప్పు ఏంటంటే, ఒక రోజు రాత్రి 10 గంటలకు, మరో రోజు అర్ధరాత్రి 1 గంటకు పడుకోవడం. మన శరీరానికి ఒక ‘బయోలాజికల్ క్లాక్’ ఉంటుంది. అందుకే ప్రతిరోజూ ఒకే సమయానికి పడుకోవడం, ఒకే సమయానికి నిద్రలేవడం అలవాటు చేసుకోవాలి. ఇక ఇలా క్రమం తప్పకుండా చేయడం వల్ల శరీరానికి ఎప్పుడు నిద్రపోవాలో అలవాటు అవుతుంది. దీనివల్ల నిద్రలేమి సమస్య తగ్గడమే కాకుండా, ముఖంలో కాంతి పెరిగి మీరు యవ్వనంగా కూడా కనిపిస్తారు. ఇది వినడానికి చిన్న విషయమే అయినా, శరీరానికి ఇచ్చే పెద్ద బూస్టింగ్ లాంటిది.
వేడి నీళ్లు.. వేపాకులు.. వెన్నెలాంటి నిద్ర: రోజంతా కష్టపడి ఇంటికి వచ్చాక శరీరం చాలా అలసటగా ఉంటుంది. నిద్రపోయే ముందు గోరువెచ్చని నీటితో స్నానం చేయడం వల్ల కండరాలు రిలాక్స్ అవుతాయి. మరీ ముఖ్యంగా ఆ నీటిలో కొన్ని వేపాకులు వేసుకుంటే, అవి చర్మ ఇన్ఫెక్షన్లను తగ్గించడమే కాకుండా రోగనిరోధక శక్తిని పెంచుతాయి.
ఇక ఒకవేళ మీకు సువాసనలు ఇష్టమైతే కొన్ని ఎసెన్షియల్ ఆయిల్స్ కూడా వాడుకోవచ్చు. అలాగే, గ్యాస్ లేదా కడుపు ఉబ్బరం వల్ల నిద్ర పట్టని వారు అరికాళ్లకు కొంచెం నెయ్యి రాసి మర్దన చేసుకుంటే, ఆందోళన తగ్గి నిమిషాల్లో గాఢ నిద్రలోకి జారుకుంటారు.
గ్యాడ్జెట్లకు గుడ్ బై.. చీకటికి వెల్కమ్: నిద్రకు కనీసం గంట ముందు మొబైల్ ఫోన్లు, లాప్టాప్ వంటివి పక్కన పెట్టేయడం చాలా ముఖ్యం. ఫోన్ నుంచి వచ్చే బ్లూ లైట్ మన మెదడును నిద్రపోనివ్వకుండా మేల్కొనేలా చేస్తుంది. అలాగే మీరు నిద్రపోయే గది ప్రశాంతంగా, చీకటిగా ఉండేలా చూసుకోండి.
గదిలో గాలి వెలుతురు సరిగ్గా ఉండాలి. వెలుతురు ఉంటే నిద్ర పట్టని వారు చిన్న నైట్ లాంప్ వాడుకోవచ్చు. తిన్న వెంటనే పడుకోకుండా, భోజనానికి నిద్రకు మధ్య కనీసం మూడు గంటల గ్యాప్ ఉండేలా ప్లాన్ చేసుకుంటే జీర్ణక్రియ బాగుండి ప్రశాంతంగా ఉంటుంది.
నిద్ర పట్టకపోతే మరీ బలవంతం వద్దు: కొన్నిసార్లు ఎంత ప్రయత్నించినా నిద్ర రాదు. అటువంటప్పుడు మంచం మీద అటు ఇటు దొర్లుతూ కష్టపడటం కంటే, కాసేపు మంచం దిగి గదిలో అటు ఇటు నడవండి. ఏదైనా బోర్ కొట్టే పుస్తకం చదవడమో లేదా ప్రశాంతమైన సంగీతం వినడమో చేయండి. అంతేకానీ మళ్ళీ ఫోన్ తీసి సోషల్ మీడియా స్క్రోలింగ్ చేయకండి. మనసును ప్రశాంతంగా ఉంచుకుంటే నిద్ర అదే వస్తుంది. చిన్న చిన్న అలవాట్లే మీ ఆరోగ్యానికి పెద్ద వరాలుగా మారుతాయని గుర్తుంచుకోండి.
గమనిక: ఈ సమాచారం కేవలం మీ అవగాహన కోసం మాత్రమే. నిద్రలేమి సమస్య తీవ్రంగా ఉంటే లేదా దీర్ఘకాలిక ఆరోగ్య సమస్యలు ఉంటే తప్పనిసరిగా డాక్టర్ను సంప్రదించడం మంచిది.
