రోజంతా పని చేసి అలసిపోవడం సహజం, కానీ విశ్రాంతి తీసుకున్నా తగ్గని అలసట, తరచూ కీళ్ల నొప్పులు వేధిస్తున్నాయా? అయితే దాన్ని లైట్ తీసుకోవద్దు. అది ‘లూపస్’ అనే దీర్ఘకాలిక వ్యాధి కావచ్చు. మనల్ని కాపాడాల్సిన రోగనిరోధక వ్యవస్థే మన శరీరంపై దాడి చేసే ఈ వింత వ్యాధి గురించి ముఖ్యంగా యువతుల్లో ఇది ఎందుకు వస్తుందనే విషయాలు ఇప్పుడు తెలుసుకుందాం.
అసలు లూపస్ అంటే ఏంటి?: సాధారణంగా మన రోగనిరోధక వ్యవస్థ బయట నుండి వచ్చే బ్యాక్టీరియా, వైరస్ల నుండి మనల్ని కాపాడుతుంది. కానీ ఈ ‘లూపస్’ (Lupus) సమస్య ఉన్నవారిలో ఆ వ్యవస్థ కన్ఫ్యూజ్ అవుతుంది. సొంత కణజాలాలను, అవయవాలను శత్రువులుగా భావించి వాటిపైనే దాడి చేస్తుంది. ఇక దీనిని ‘ఆటో ఇమ్యూన్’ వ్యాధి అని పిలుస్తారు. ఇక దీనివల్ల ఒంట్లో వాపులు, ఇన్ఫెక్షన్లు మొదలవుతాయి.
లక్షణాలను ఎలా గుర్తించాలి?: ఈ వ్యాధి లక్షణాలు చాలా సాదాసీదాగా కనిపిస్తాయి. తీవ్రమైన అలసట, కీళ్లలో వాపు మరియు నొప్పులు, విపరీతంగా జుట్టు రాలడం వంటివి ప్రధానంగా కనిపిస్తాయి. ఇక మరో ముఖ్యమైన గుర్తు ఏమిటంటే.. ముఖంపై, ముక్కుకు ఇరువైపులా ‘సీతాకోకచిలుక’ ఆకారంలో ఎర్రటి దద్దుర్లు రావడం. ఎండలోకి వెళ్తే ఈ సమస్య మరింత పెరుగుతుంది.
ఎవరికి ఎక్కువగా వస్తుంది?: పరిశోధనల ప్రకారం, ఈ వ్యాధి ఎక్కువగా 20 నుండి 30 ఏళ్ల మధ్య వయస్సున్న మహిళల్లో కనిపిస్తుంది. దీనికి ప్రధాన కారణం శరీరంలోని హార్మోన్ల మార్పులు కావచ్చు. అలాగే జన్యుపరమైన కారణాల వల్ల కూడా ఒకరి నుండి మరొకరికి వచ్చే అవకాశం ఉంది. ఇక పురుషుల కంటే మహిళలకే ఈ ముప్పు 9 రెట్లు ఎక్కువగా ఉంటుందని నిపుణులు చెబుతున్నారు.
జాగ్రత్త పడకపోతే ప్రమాదమే: లూపస్ను సరైన సమయంలో గుర్తించి ట్రీట్మెంట్ తీసుకోకపోతే, అది కిడ్నీలు, గుండె, ఊపిరితిత్తులు మరియు మెదడుపై తీవ్ర ప్రభావం చూపుతుంది. ఇక అందుకే పైన చెప్పిన లక్షణాలు దీర్ఘకాలం పాటు వేధిస్తుంటే వెంటనే డాక్టర్ను సంప్రదించి రక్త పరీక్షలు చేయించుకోవడం మంచిది. సరైన ఆహారం, జీవనశైలి మార్పులతో ఈ సమస్యను అదుపులో ఉంచుకోవచ్చు.
శరీరం ఇచ్చే చిన్న చిన్న సంకేతాలే రేపు పెద్ద ఆరోగ్య సమస్యలకు దారి తీయవచ్చు. అలసటను కేవలం పని ఒత్తిడి అని సరిపెట్టుకోకుండా, ఆరోగ్యం పట్ల అప్రమత్తంగా ఉండటం అవసరం.
గమనిక: పైన ఇచ్చిన సమాచారం కేవలం ప్రాథమిక అవగాహన కోసం మాత్రమే. మీకు ఏవైనా ఆరోగ్య సమస్యలు ఉంటే వెంటనే డాక్టరును సంప్రదించి సరైన సలహా పొందండి.
 వ్యాధి లక్షణాలు, కారణాలు మరియు అది శరీర అవయవాలపై చూపే ప్రభావం గురించి పూర్తి అవగాహన కోసం..){kind=link}