ప్రస్తుత రోజుల్లో చదువు, కెరీర్, లైఫ్ సెటిల్మెంట్ అంటూ చాలా మంది మహిళలు పెళ్లిని, గర్భధారణను లేట్గా ప్లాన్ చేసుకుంటున్నారు. అయితే 35 నుండి 40 ఏళ్లు దాటిన తర్వాత ప్రెగ్నెన్సీ ప్లాన్ చేయడం వల్ల కొన్ని రకాల ఆరోగ్య సమస్యలు ఎదురయ్యే అవకాశం ఉందని వైద్య నిపుణులు హెచ్చరిస్తున్నారు. మరి ఆ రిస్క్లు ఏంటో, ఎలాంటి జాగ్రత్తలు తీసుకోవాలో ఇప్పుడు చూద్దాం.
అండాల నాణ్యత తగ్గడం: మహిళల్లో వయసు పెరుగుతున్న కొద్దీ వారి గర్భాశయంలో ఉండే అండాల సంఖ్యతో పాటు వాటి నాణ్యత (క్వాలిటీ) కూడా క్రమంగా తగ్గుతుంది. 40 ఏళ్ల తర్వాత సహజంగా గర్భం దాల్చడం కొంచెం కష్టంగా మారడానికి ఇదే ప్రధాన కారణం. ఒకవేళ ప్రెగ్నెన్సీ వచ్చినా అబార్షన్ (గర్భస్రావం) అయ్యే అవకాశాలు ఎక్కువగా ఉంటాయని వైద్యులు చెబుతున్నారు.
ప్రీ-టర్మ్ డెలివరీ సమస్యలు: లేట్ వయసులో గర్భం దాల్చినప్పుడు నెలలు నిండకుండానే కాన్పు అయ్యే ప్రమాదం (ప్రీ-టర్మ్ డెలివరీ) ఉంటుంది. దీనివల్ల పుట్టబోయే బిడ్డ తక్కువ బరువుతో పుట్టడం లేదా ఇతర ఆరోగ్య సమస్యలు తలెత్తే అవకాశం ఉంది. అందుకే ఈ వయసులో గర్భిణీలు చాలా జాగ్రత్తగా ఉండాలి.
హైబీపీ, ఇతర అవయవాలపై ఒత్తిడి: గర్భధారణ సమయంలో చాలా మంది మహిళల్లో రక్తపోటు (హైబీపీ) పెరిగే అవకాశం ఉంది. ముఖ్యంగా 40 దాటిన వారిలో ఈ సమస్య మరింత ఎక్కువ అవుతుంది. ఈ హైబీపీ కారణంగా కిడ్నీలు, లివర్ వంటి ముఖ్యమైన అవయవాలపై తీవ్రమైన ఒత్తిడి పడి, తల్లి ఆరోగ్యానికి ముప్పు వాటిల్లే ప్రమాదం ఉంది.
వయసు పైబడిన తర్వాత ప్రెగ్నెన్సీ రావడం అసాధ్యమేమీ కాదు, కానీ రిస్క్ కాస్త ఎక్కువగా ఉంటుంది. అందుకే 40 దాటాక గర్భం దాల్చాలని అనుకునే వారు ముందుగానే డాక్టర్ను కలిసి, వారి నిరంతర పర్యవేక్షణలో ఉంటూ సరైన జాగ్రత్తలు, పోషకాహారం తీసుకోవడం చాలా అవసరం.
గమనిక: ప్రెగ్నెన్సీ ప్లాన్ చేసే ముందు భార్యాభర్తలిద్దరూ హెల్త్ చెకప్స్ చేయించుకోవడం మంచిది. వైద్యుల సలహా మేరకు ఫోలిక్ యాసిడ్ వంటి సప్లిమెంట్స్ వాడడం వల్ల కొన్ని రకాల సమస్యలను నివారించవచ్చు.
