ఈ రోజుల్లో మనం రోజూ వాడే సబ్బులు, బాడీ వాష్లలో రసాయనాలు (కెమికల్స్) ఎక్కువగా ఉంటున్నాయి. ఇవి చర్మాన్ని శుభ్రం చేసినట్లు అనిపించినా లోపల ఉండే సహజమైన తేమను లాగేసి చర్మాన్ని పొడిబారుస్తాయి. ముఖ్యంగా వేసవిలో ఎండ దుమ్ము వల్ల చర్మం నల్లగా, జీవం లేనట్లు తయారవుతుంది. మరి దీనికి కెమికల్స్ లేని పరిష్కారం ఏంటి? మన ఇంట్లోనే ఆయుర్వేద మూలికలతో తయారుచేసుకునే ‘నేచురల్ బాత్ పౌడర్’ చర్మాన్ని ఎలా మెరిపిస్తుందో ఇప్పుడు చూద్దాం.
కావలసిన ఐదు అద్భుత మూలికలు: ఈ నాచురల్ బాత్ పౌడర్ కోసం మనకు ఐదు ముఖ్యమైన ఆయుర్వేద పదార్థాలు కావాలి. అవి: అంబా పసుపు, ఎండబెట్టిన గులాబీ రేకులు మంజిష్ఠ, వేప ఆకులు మరియు అర్జున బెరడు. ఇవన్నీ చర్మ సంరక్షణలో ఎంతో ప్రాచుర్యం పొందినవి. ఇక ఇవి చర్మానికి ఎలాంటి హాని చేయకుండా, లోపలి నుండి మురికిని, చనిపోయిన కణాలను తొలగించి చర్మాన్ని ఆరోగ్యంగా ఉంచడంలో అద్భుతంగా పనిచేస్తాయి.
పౌడర్ తయారీ విధానం: ఈ బాత్ పౌడర్ తయారు చేసుకోవడం చాలా సులువు. ముందుగా మనం చెప్పుకున్న ఐదు పదార్థాలను సమాన పరిమాణంలో తీసుకోవాలి. వీటిని ఒక మిక్సీ జార్లో వేసి మెత్తటి పౌడర్లా గ్రైండ్ చేసుకోవాలి. ఇక ఆ తర్వాత ఈ పొడిని బాగా కలిపి, గాలి చొరబడని ఒక గాజు సీసాలో లేదా ప్లాస్టిక్ డబ్బాలో భద్రపరుచుకోవాలి. ఇలా చేసి పెట్టుకుంటే ఈ పౌడర్ నెలల తరబడి అస్సలు పాడవకుండా ఉంటుంది.
ఎలా ఉపయోగించాలి?: మీరు స్నానం చేసే సమయానికి కొద్దిగా ముందు, ఒకటి లేదా రెండు చెంచాల పౌడర్ను ఒక గిన్నెలోకి తీసుకోండి. అందులో కొద్దిగా నీళ్లు కలిపి మెత్తని పేస్ట్లా చేసుకోవాలి. ఈ పేస్ట్ను ఒంటికి, ముఖానికి బాగా అప్లై చేసి, చేతులతో మృదువుగా రుద్దుతూ మసాజ్ చేయాలి. ఇక ఆ తర్వాత నార్మల్ నీళ్లతో కడిగేసుకోవాలి. ప్రతిరోజూ సబ్బుకు బదులు దీనిని వాడితే మార్పు మీకే తెలుస్తుంది.
ఈ పౌడర్ వల్ల కలిగే ప్రయోజనాలు: ఈ నాచురల్ క్లెన్సర్ చర్మంలోని సహజ నూనెలను పోనివ్వకుండా మురికిని వదిలిస్తుంది. ఇందులోని అంబా పసుపు చర్మ ఛాయను పెంచి మచ్చలను తగ్గిస్తే, గులాబీ రేకులు మంచి సువాసనను, తేమను అందిస్తాయి. ఇక మంజిష్ఠ చర్మాన్ని శుద్ధి చేసి నల్లదనాన్ని తగ్గిస్తుంది. వేప, అర్జున బెరడులు చర్మ ఇన్ఫెక్షన్లు రాకుండా కాపాడతాయి. దీనివల్ల రక్తప్రసరణ కూడా మెరుగవుతుంది.
ఇక అందంగా, కాంతివంతంగా కనిపించడానికి మార్కెట్లో దొరికే కాస్ట్లీ కెమికల్ ప్రొడక్ట్స్ అవసరం లేదు. మన అమ్మమ్మల కాలం నాటి ఈ ఆయుర్వేద బాత్ పౌడర్ను అలవాటు చేసుకుంటే చర్మం సహజంగానే మెరిసిపోతుంది.
