మన దేశంలో క్రికెట్కు ఉన్న క్రేజ్ అంతా ఇంతా కాదు. ఇక్కడ క్రికెటర్లను దేవుళ్లుగా చూస్తారు, కోట్ల రూపాయల ఐపీఎల్ కాంట్రాక్టులు చూసి మురిసిపోతుంటారు. కానీ, గ్లోబల్ స్పోర్ట్స్ మార్కెట్లో ఫుట్బాల్ రేంజ్ ఏంటో తెలిస్తే మాత్రం ఎవరికైనా మైండ్ బ్లాక్ అవ్వడం ఖాయం. మరో రెండు రోజుల్లో ప్రారంభం కానున్న ఫిఫా (FIFA) వరల్డ్కప్లో ఇచ్చే ప్రైజ్మనీ ఇప్పుడు ప్రపంచవ్యాప్తంగా హాట్ టాపిక్గా మారింది. మన ప్రాణప్రదమైన క్రికెట్ వరల్డ్కప్ ప్రైజ్మనీ కంటే ఇది వందల రెట్లు ఎక్కువగా ఉండటం విశేషం.
ఫిఫా ప్రైజ్మనీ..ఏకంగా ₹8 వేల కోట్లు: ఈసారి జరుగుతున్న ఫిఫా వరల్డ్కప్లో మొత్తం 48 జట్లు తలపడుతున్నాయి. ఈ టోర్నీ కోసం ఫిఫా కేటాయించిన మొత్తం ప్రైజ్ పూల్ అక్షరాలా 871 మిలియన్ డాలర్లు. అంటే మన భారతీయ కరెన్సీలో అంచనా వేస్తే దాదాపు 8 వేల కోట్ల రూపాయల కంటే ఎక్కువ అన్నమాట. ఇక కేవలం ఒకే ఒక్క స్పోర్ట్స్ టోర్నమెంట్కు ఈ స్థాయిలో బహుమతి మొత్తాన్ని ప్రకటించడం క్రీడా చరిత్రలోనే ఒక సంచలనం.
గెలిచిన జట్టుకు ఎంత? ఓడిన టీమ్కు ఎంత?: ఈ టోర్నీలో కప్పు కొట్టిన విజేత జట్టుకు ఏకంగా $50 మిలియన్ డాలర్లు (సుమారు రూ. 400 కోట్లకు పైగా) ప్రైజ్మనీగా అందుతుంది. రన్నరప్గా నిలిచిన టీమ్కు 33 మిలియన్లు, మూడో స్థానంలో నిలిచిన జట్టుకు 29 మిలియన్ డాలర్లు లభిస్తాయి. ఇక ఇదంతా ఒకెత్తయితే, టోర్నీలో క్వాలిఫై అయ్యి గ్రూప్ స్టేజ్ లోనే వెనుతిరిగే జట్లకు కూడా తలో 9 మిలియన్ డాలర్లు (దాదాపు రూ. 75 కోట్లు) లభించడం విశేషం.
క్రికెట్కు భారీ షాక్.. 87 రెట్లు ఎక్కువ: ఇప్పుడు అసలైన పోలిక చూద్దాం. మనకు అత్యంత ప్రతిష్టాత్మకమైన 2023 క్రికెట్ వరల్డ్కప్ (CWC) మొత్తం టోర్నీ ప్రైజ్ పూల్ కేవలం 10 మిలియన్ డాలర్లు మాత్రమే. అంటే క్రికెట్ వరల్డ్కప్లో పాల్గొన్న అన్ని జట్లకు కలిపి ఇచ్చిన మొత్తం కంటే, ఈ ఫిఫా వరల్డ్కప్ ప్రైజ్ పూల్ ఏకంగా 87 రెట్లు ఎక్కువ! క్రికెట్ వరల్డ్కప్ మొత్తాన్ని ఫిఫాలో గ్రూప్ స్టేజ్లో ఓడిపోయే ఒకే ఒక్క జట్టుకు వచ్చే మనీతో సమానంగా చూడొచ్చు.
క్రికెట్కు కొన్ని దేశాల్లోనే విపరీతమైన ఆదరణ ఉంటే, ఫుట్బాల్ను ప్రపంచంలోని ప్రతి మూలలోనూ ఆరాధిస్తారు. ఈ ప్రైజ్మనీల తేడాను చూస్తే గ్లోబల్ మార్కెట్లో ఫుట్బాల్ బిజినెస్ రేంజ్ ఏంటో, దానికి ఉన్న స్పాన్సర్షిప్ పవర్ ఏంటో అర్థం చేసుకోవచ్చు. ఏదేమైనా, ఈ ఫిఫా ప్రైజ్మనీ లెక్కలు మాత్రం ప్రస్తుతం క్రికెట్ అభిమానులకు గట్టి షాక్ ఇస్తున్నాయనే చెప్పాలి.
