ఈ రోజుల్లో చిన్న సూది దగ్గర నుంచి పెద్ద కార్ల వరకు ఏ సమాచారం కావాలన్నా మనం వెంటనే గూగుల్ తల్లిని ఆశ్రయిస్తాం. అయితే, గూగుల్లో అన్ని సార్లూ సరైన సమాచారమే దొరుకుతుందని అనుకుంటే పొరపాటే. కొన్ని రకాల విషయాలను గూగుల్లో వెతికితే తీవ్రమైన ఇబ్బందులు ఎదుర్కోవాల్సి వస్తుందని టెక్ నిపుణులు హెచ్చరిస్తున్నారు. మీ పర్సనల్ డేటా, డబ్బు సేఫ్గా ఉండాలంటే గూగుల్లో వెతకకూడని ఆ 5 విషయాల గురించి ఇప్పుడు చూద్దాం.
ఫేక్ కస్టమర్ కేర్ నంబర్లు: బ్యాంక్ అకౌంట్ సమస్యలైనా లేదా ఆన్లైన్ షాపింగ్ డౌట్లైనా.. చాలా మంది గూగుల్లో కస్టమర్ కేర్ నంబర్ల కోసం వెతుకుతుంటారు. సైబర్ నేరగాళ్లు గూగుల్లో ఫేక్ నంబర్లను పెడుతుంటారు. వాటిని నిజమని నమ్మి ఫోన్ చేస్తే, వారు మీ పర్సనల్ డిటైల్స్ అడిగి, ఓటీపీ (OTP)లు చెప్పించుకుని క్షణాల్లో మీ అకౌంట్ ఖాళీ చేస్తారు.
ఉచిత సాఫ్ట్వేర్ల డౌన్లోడ్: పెయిడ్ సాఫ్ట్వేర్లు లేదా యాప్లు ఉచితంగా దొరుకుతున్నాయని గూగుల్లో వెతికి లింకులపై క్లిక్ చేయకండి. ఇక ఇలాంటి ఫ్రీ సాఫ్ట్వేర్లతో పాటు ప్రమాదకరమైన వైరస్లు, మాల్వేర్లు మీ కంప్యూటర్ లేదా మొబైల్లోకి వచ్చేస్తాయి. ఇవి మీ డివైజ్లను హ్యాక్ చేసి, మీ ప్రైవేట్ డేటాను దొంగిలిస్తాయి.
గూగుల్ చూసి సొంత వైద్యం: ఒంట్లో నలతగా ఉంటే గూగుల్లో లక్షణాలు సెర్చ్ చేసి సొంత వైద్యం చేసుకోవడం చాలా పెద్ద తప్పు. గూగుల్లో ఉండే సమాచారం అందరికీ ఒకేలా వర్తించదు. గూగుల్ చూసి ట్యాబ్లెట్లు వేసుకోవడం వల్ల లేనిపోని సైడ్ ఎఫెక్ట్స్ వచ్చి ప్రాణాలకే ప్రమాదం కావచ్చు. ఇక అనారోగ్యంగా ఉంటే డాక్టర్ని సంప్రదించడమే సురక్షితం.
ఈజీ మనీ సంపాదన ఆశలు: “తక్కువ టైమ్లో ఎక్కువ డబ్బు సంపాదించడం ఎలా?” అని గూగుల్లో వెతికితే బోలెడు స్కామ్ వెబ్సైట్లు కనిపిస్తాయి. ‘టాస్క్లు పూర్తి చేస్తే డబ్బులు ఇస్తాం’ ‘ఇంట్లో కూర్చుని లక్షలు సంపాదించవచ్చు’ అనే ఆశ చూపి మొదట్లో కొద్దిగా డబ్బులిచ్చి, ఆ తర్వాత మీతో పెద్ద మొత్తంలో పెట్టుబడి పెట్టించి ముంచేస్తారు.
వ్యక్తిగత సమాచారం వెతకడం: మీ ఈమెయిల్ ఐడీ, ఫోన్ నంబర్, ఆధార్ కార్డు వంటి వ్యక్తిగత వివరాలను లేదా మీ అడ్రస్లను గూగుల్లో పదే పదే సెర్చ్ చేయకూడదు. ఇక ఇలా చేయడం వల్ల మీ డేటా హ్యాకర్ల బారిన పడే అవకాశం ఉంది. మీ సెర్చ్ హిస్టరీ ఆధారంగా మిమ్మల్ని టార్గెట్ చేసి సైబర్ మోసాలకు పాల్పడే ప్రమాదం ఉంది.
గూగుల్ అనేది మనకు సహాయపడే ఒక మంచి సాధనం మాత్రమే, కానీ దాన్ని వాడేటప్పుడు మనకు కూడా కాస్త అవగాహన, జాగ్రత్త ఉండాలి. తెలియక చేసే ఇలాంటి చిన్న చిన్న తప్పుల వల్ల భారీ మూల్యం చెల్లించుకోవాల్సి వస్తుంది. కాబట్టి గూగుల్ని స్మార్ట్గా, సేఫ్గా ఉపయోగించండి.
గమనిక: ఈ ఆర్టికల్ కేవలం సైబర్ భద్రత మరియు ఇంటర్నెట్ వినియోగంపై పాఠకులలో అవగాహన కల్పించడం కోసం టెక్ నిపుణుల సూచనల ఆధారంగా అందించబడింది.
