చాలా మంది రాత్రి పూట నిద్రపోతున్నప్పుడు రెండు లేదా అంతకంటే ఎక్కువ సార్లు యూరిన్ కోసం లేస్తూ ఉంటారు. ఏదో అలవాటుగానో లేదా నీళ్లు ఎక్కువ తాగడం వల్లో అలా జరుగుతుందని అనుకుంటారు. కానీ, రాత్రిళ్లు ఇలా పదే పదే మూత్రవిసర్జన చేయాల్సి రావడాన్ని వైద్య పరిభాషలో ‘నాక్టూరియా’ (Nocturia) అంటారు. దీన్ని ఎంతమాత్రం నిర్లక్ష్యం చేయకూడదని ఆరోగ్య నిపుణులు హెచ్చరిస్తున్నారు. ఆ వివరాలు చూద్దాం..
సాధారణ కారణాలు ఇవే: రాత్రి పడుకునే ముందు ఎక్కువగా నీళ్లు తాగడం వల్ల ఇలా జరగడం సహజం. అలాగే లేట్ నైట్ కాఫీ టీలు ఎక్కువగా తాగడం ఆల్కహాల్ సేవించడం వల్ల కూడా రాత్రి వేళల్లో అధికంగా మూత్రవిసర్జన అవుతుంది. ఇక ఇవి కాకుండా సాధారణంగా వయసు పైబడిన వారిలో ఈ సమస్య కొంచెం ఎక్కువగా కనిపిస్తుంది.
దాగి ఉన్న కొన్ని సీరియస్ సమస్యలు: కేవలం అలవాట్లే కాకుండా కొన్ని రకాల అనారోగ్య సమస్యల వల్ల కూడా రాత్రిళ్లు పదే పదే మెలకువ వస్తుంది. ఇక కిడ్నీలు సరిగ్గా పనిచేయకపోవడం మూత్రనాళాల ఇన్ఫెక్షన్లు (UTI), డయాబెటిస్ ఊబకాయం మరియు హైబీపీ వంటి వ్యాధులు ఉన్నప్పుడు ఈ సమస్య వస్తుంది. పురుషులలో ప్రొస్టేట్ గ్రంథి వాపు రావడం వల్ల కూడా ఇలా జరుగుతుంది.
నిద్ర లేమితో ఇతర ఇబ్బందులు: రాత్రి వేళల్లో పదే పదే బెడ్ మీద నుంచి లేవడం వల్ల గాఢ నిద్ర దెబ్బతింటుంది. దీనివల్ల ఉదయానికి నీరసంగా అనిపించడం, రోజంతా అలసటగా ఉండటం, చిరాకు, పనులపై శ్రద్ధ పెట్టలేకపోవడం వంటి సమస్యలు ఎదురవుతాయి. ఇక నిద్ర లేకపోవడం వల్ల మెదడు ఆరోగ్యం కూడా దెబ్బతింటుంది.
ఇక రాత్రిళ్లు ఒకటి లేదా రెండు సార్ల కంటే ఎక్కువగా యూరిన్ కోసం లేవాల్సి వస్తుంటే, అది మీ దైనందిన జీవితాన్ని ఇబ్బంది పెడుతుంటే వెంటనే అలర్ట్ అవ్వాలి. జీవనశైలిలో మార్పులు చేసుకున్నా సమస్య తగ్గకపోతే, ఏ మాత్రం ఆలస్యం చేయకుండా డాక్టర్ను సంప్రదించి పరీక్షలు చేయించుకోవడం ఎంతో మంచిది.
గమనిక:ఈ సమాచారం కేవలం మీ అవగాహన కోసం మాత్రమే ఇవ్వబడింది. రాత్రి పూట అధిక మూత్రవిసర్జన సమస్య తీవ్రంగా ఉంటే, ఖచ్చితమైన కారణాన్ని తెలుసుకోవడానికి మరియు సరైన చికిత్స కోసం తప్పనిసరిగా అర్హులైన వైద్యులను సంప్రదించాలి
