మీ చేతికి ఉన్న స్మార్ట్వాచ్ క్షణక్షణానికీ హార్ట్ రేట్, ఆక్సిజన్ లెవెల్స్ చూపిస్తూ మిమ్మల్ని భయపెడుతోందా? ఫిట్నెస్ కోసం వాడే ఈ స్మార్ట్వాచ్లే ఇప్పుడు కొత్త సమస్యలను తెచ్చిపెడుతున్నాయి. వాచ్ ఇచ్చే నోటిఫికేషన్లు, అంకెలు చూసి చాలామంది తీవ్రమైన ఆందోళనకు గురవుతున్నారని వైద్యులు హెచ్చరిస్తున్నారు. ఎలాంటి లక్షణాలు లేకపోయినా అనవసరంగా భయపడటం వల్ల ఆరోగ్యం దెబ్బతింటోందట. దీనిపై నిపుణులు ఏమంటున్నారో, ఈ అలర్ట్తో వచ్చే ప్రమాదాలేంటో ఇప్పుడు తెలుసుకుందాం.
హెల్త్ యాంగ్జెటీ అంటే ఏమిటి?: స్మార్ట్వాచ్లలో నిరంతరం మారే హార్ట్ రేట్, ఆక్సిజన్ రీడింగ్స్ను ప్రతిక్షణం గమనిస్తూ ఉండటం వల్ల ప్రజల్లో అనవసర భయం పెరిగిపోతోంది. ఇక వైద్య పరిభాషలో దీనినే ‘హెల్త్ యాంగ్జెటీ’ అంటారు. శరీరంలో ఎలాంటి అసౌకర్యం లేదా రోగ లక్షణాలు లేకపోయినా.. డిజిటల్ స్క్రీన్ మీద కనిపించే చిన్న చిన్న వ్యత్యాసాలను చూసి ప్యానిక్ అయిపోతున్నారు.
అతి పర్యవేక్షణతో కొత్త జబ్బులు: మన ఆరోగ్యాన్ని పరిమితికి మలే పర్యవేక్షించడం వల్ల శరీరంలో ఒత్తిడి, ఆందోళన తీవ్రస్థాయికి చేరుకుంటాయి. ఇక ఇలా నిరంతరం మానసిక ఒత్తిడికి గురికావడం వల్ల అసిడ్ రిఫ్లక్స్ (కడుపులో మంట), ఐబీఎస్ (ఇరిటబుల్ బౌల్ సిండ్రోమ్) వంటి జీర్ణక్రియ సంబంధిత సమస్యలు తలెత్తుతాయని వైద్య నిపుణులు హెచ్చరిస్తున్నారు.
మీరు ఏం చేయాలి?: స్మార్ట్వాచ్లను కేవలం ఒక అంచనా కోసం మాత్రమే వాడాలి తప్ప, దాన్నే పూర్తి మెడికల్ రిపోర్టుగా భావించకూడదు. ఇక రోజంతా చేతి గడియారం వైపే చూస్తూ రీడింగ్స్ చెక్ చేసుకునే అలవాటును తగ్గించుకోవాలి. వాచ్ రీడింగ్ మారినంత మాత్రాన భయపడకుండా, మీ శరీరంలో నిజంగా ఏమైనా ఇబ్బంది అనిపిస్తేనే శ్రద్ధ పెట్టాలి.
ఇక సాంకేతికత మన సహాయం కోసమే తప్ప, మనల్ని భయపెట్టడానికి కాదు. స్మార్ట్వాచ్ ఇచ్చే అలర్ట్ల కంటే మీ శరీరంలో కనిపించే నిజమైన లక్షణాలను నమ్మడమే మంచిది. డిజిటల్ పరికరాలపై అతిగా ఆధారపడకుండా, ప్రశాంతంగా ఉండటమే అసలైన ఆరోగ్యం.
గమనిక: మీ స్మార్ట్వాచ్లో హార్ట్ రేట్ లేదా ఆక్సిజన్ పరిమాణంలో తేడాలు వచ్చి, దాంతో పాటు గుండెదడ, శ్వాస తీసుకోవడంలో ఇబ్బంది లేదా కళ్ళు తిరగడం వంటి నిజమైన లక్షణాలు కనిపిస్తే మాత్రం వెంటనే డాక్టర్ను సంప్రదించి ఇసిజి (ECG) లేదా ఇతర వైద్య పరీక్షలు చేయించుకోవడం మంచిది.
