రసాయనాలతో నిండిన రంగు రంగుల చిరుతిళ్లు చూసేందుకు ఎంతో ఆకర్షణీయంగా ఉంటూ, పిల్లల నుంచి పెద్దల వరకు అందరినీ ఊరిస్తుంటాయి. కానీ ఆ రంగుల వెనుక దాగున్న ఆరోగ్య ప్రమాదాలను గుర్తించకపోతే తీవ్ర నష్టం తప్పదు. రోడ్డు పక్కన అమ్మే ఫాస్ట్ ఫుడ్స్ నుండి ప్రముఖ కంపెనీల స్నాక్స్ వరకు వాడుతున్న ఈ ఆర్టిఫిషియల్ ఫుడ్ కలర్స్ వల్ల మన శరీరానికి ఎలాంటి హాని జరుగుతుందో, అసలు ఎలాంటి జాగ్రత్తలు తీసుకోవాలో ఇప్పుడు వివరంగా తెలుసుకుందాం.
రంగుల వెనుక దాగున్న విష రసాయనాలు: కృత్రిమ రంగులు అనేవి పెట్రోలియం, ఇతర రసాయనాల సమ్మేళనంతో తయారవుతాయి. ఆహారం అందంగా కనిపించడానికి వీటిని వాడుతుంటారు. ఇక కానీ ఇవి ఆహారంతో పాటు పొట్టలోకి చేరినప్పుడు ఎన్నో రకాల కెమికల్స్ శరీరంలోకి వెళ్లి జీర్ణ వ్యవస్థను, రక్తాన్ని కలుషితం చేస్తాయి.
ఎదురయ్యే తీవ్ర ఆరోగ్య సమస్యలు: ఈ కృత్రిమ రంగుల వల్ల అలర్జీలు రావడం, పిల్లల్లో అతిచంచలత్వం (హైపర్యాక్టివిటీ) పెరగడం వంటివి జరుగుతాయి. ఇక దీర్ఘకాలంలో వీటిని తీసుకోవడం వల్ల కొన్ని రకాల క్యాన్సర్లు వచ్చే ముప్పు కూడా ఉందని పరిశోధనలు హెచ్చరిస్తున్నాయి.
అనుమతించిన రంగులతోనూ ప్రమాదమే: టార్టజైన్ (పసుపు), ఎరిత్రాసిన్ (ఎరుపు) బ్రిలియంట్ బ్లూ (నీలం) ఫాస్ట్ గ్రీన్ల వంటి కొన్ని రంగులకు అనుమతి ఉన్నప్పటికీ.. వాటిని నిర్ణీత ప్రమాణాల కంటే ఎక్కువ వాడితే విషంగా మారతాయి. ఉదాహరణకు బిర్యానీ, లడ్డూల్లో వాడే మెటనిల్ పసుపు వల్ల నీరసం, తలతిప్పడం, వాంతులు అవుతాయి.
సహజ రంగులకే ప్రాధాన్యం ఇవ్వండి: క్లోరోఫిల్, అన్నాట్టో, కారామెల్ వంటివి ప్రకృతిసిద్ధమైన రంగులు. కెమికల్స్ ఉండే ఆర్టిఫిషియల్ కలర్స్ బదులు సహజ రంగులకు ప్రాధాన్యం ఇవ్వడం మేలు. ఇక పిల్లలకు బయట దొరికే రంగు రంగుల ఐస్క్రీములు, బిస్కెట్లు, జెల్లీలు కొనిచ్చే ముందు ఒక్కసారి ఆలోచించడం అవసరం.
ఇక ఆహారం కేవలం చూడటానికి ఆకర్షణీయంగా ఉంటే సరిపోదు, అది ఆరోగ్యకరంగా ఉండటం ముఖ్యం. రంగుల ఆకర్షణలో పడి ఆరోగ్యాన్ని పాడుచేసుకోకుండా కృత్రిమ రంగులు కలిపిన ఆహారానికి వీలైనంత దూరంగా ఉండటమే శ్రేయస్కరం.
గమనిక: ఇది కేవలం మీ అవగాహన కోసం అందించిన సాధారణ ఆరోగ్య సమాచారం మాత్రమే. మీకు లేదా మీ పిల్లలకు ఫుడ్ అలెర్జీలు లేదా జీర్ణ సమస్యలు ఉంటే వెంటనే డాక్టర్ను సంప్రదించండి.
