కిడ్నీలో రాళ్లు ఉన్నవారు జాగ్రత్త… ఈ ఫుడ్స్ అసలు తినకండి!

ప్రస్తుత రోజుల్లో కిడ్నీలో రాళ్ల సమస్యతో చాలామంది తీవ్రమైన నొప్పితో బాధపడుతున్నారు. ఒకసారి కిడ్నీ స్టోన్స్ వచ్చాయంటే మూత్ర విసర్జనలో ఇబ్బందులు, విపరీతమైన నొప్పి వెంటాడుతుంటాయి. అయితే మన ఆహారపు అలవాట్లలో కొన్ని చిన్న చిన్న మార్పులు చేసుకోవడం ద్వారా ఈ సమస్య నుంచి ఉపశమనం పొందవచ్చని నిపుణులు చెప్తున్నారు. మరి కిడ్నీలో రాళ్ల ప్రమాదాన్ని పెంచే ఆ ఆహారాలేంటో ఇప్పుడు చూద్దాం.

ఉప్పు వాడకం తగ్గించండి: ఆహారంలో ఉప్పు మోతాదు ఎక్కువైతే మూత్రంలో కాల్షియం విడుదల పెరిగి కిడ్నీలో రాళ్లు ఏర్పడే అవకాశం ఎక్కువవుతుంది. అందుకే రోజుకు 3 గ్రాముల కంటే ఎక్కువ ఉప్పు తీసుకోకూడదు. ఇక ముఖ్యంగా ప్రాసెస్డ్ ఫుడ్స్, పచ్చళ్లు, చిప్స్, ఫాస్ట్ ఫుడ్స్ వంటి అధిక ఉప్పు ఉండే పదార్థాలకు దూరంగా ఉండటం మంచిది.

చక్కెర, కూల్‌డ్రింక్స్‌కు దూరంగా: చక్కెర ఎక్కువగా ఉండే స్వీట్లు మరియు ఫాస్ఫారిక్ యాసిడ్ ఉండే శీతల పానీయాలు (సాఫ్ట్ డ్రింక్స్) కిడ్నీ స్టోన్ ప్రమాదాన్ని రెట్టింపు చేస్తాయి. ఇక వీటి స్థానంలో తీపి తక్కువగా ఉండే సహజ సిద్ధమైన పండ్ల రసాలు, నిమ్మరసం లేదా మజ్జిగ వంటి పానీయాలను ఎంచుకోవడం ఆరోగ్యానికి ఎంతో మేలు చేస్తుంది.

మాంసాహారం పరిమితంగానే: మటన్, పోర్క్ వంటి రెడ్ మీట్‌ను ఎక్కువగా తీసుకోవడం వల్ల శరీరంలో యూరిక్ యాసిడ్ స్థాయిలు పెరిగి కొన్ని రకాల కిడ్నీ రాళ్లు తయారవుతాయి. ఇక నాన్-వెజ్ పూర్తిగా మానేయాల్సిన అవసరం లేకపోయినా, వారంలో చాలా పరిమిత మోతాదులో మాత్రమే తీసుకోవడం శ్రేయస్కరం.

పాలకూర, బీట్‌రూట్ మోతాదు ముఖ్యం: పాలకూర, బీట్‌రూట్ ఆరోగ్యానికి మంచివే అయినప్పటికీ, వీటిలో ‘ఆక్సలేట్స్’ అధికంగా ఉంటాయి. ఇక ఇవి కిడ్నీ రాళ్లకు కారణమవుతాయి. కాబట్టి వీటిని తరచుగా తినకుండా పరిమితంగా తీసుకోవాలి. ఒకవేళ తిన్నా, కాల్షియం ఉన్న ఆహారాలతో కలిపి తీసుకుంటే ఆక్సలేట్ల ప్రభావం కొంతవరకు తగ్గుతుంది.

ఇక కిడ్నీ ఆరోగ్యాన్ని కాపాడుకోవడానికి పైన పేర్కొన్న ఆహారాలను పూర్తిగా మానాల్సిన పనిలేకపోయినా, మోతాదు నియంత్రణ చాలా అవసరం. వీటితో పాటు రోజూ తగినంత నీరు తాగుతూ, సమతుల్య ఆహారం తీసుకుంటే కిడ్నీలో రాళ్ల సమస్య నుంచి సులభంగా ఉపశమనం పొందవచ్చు!

గమనిక: ఇది కేవలం అవగాహన కోసం అందించిన సాధారణ సమాచారం మాత్రమే. మీకు తీవ్రమైన కిడ్నీ సమస్యలు లేదా లక్షణాలు ఉంటే తప్పకుండా యూరాలజిస్ట్ లేదా డాక్టర్‌ను సంప్రదించి సలహా తీసుకోండి.