ఈ రోజుల్లో ఒత్తిడి, పనిభారం వల్ల చాలామంది సరిగ్గా నిద్రపోలేకపోతున్నారు. ముఖ్యంగా మహిళల్లో ఈ నిద్రలేమి సమస్య ఎక్కువగా కనిపిస్తోంది. ఎన్నో ప్రయత్నాలు చేసినా ప్రశాంతమైన నిద్ర కరువవుతోందా? అయితే నిపుణులు ప్రతిపాదిస్తున్న ‘జీరో గ్రావిటీ స్లీప్’ గురించి మీరు తప్పక తెలుసుకోవాలి. వ్యోమగాములు అంతరిక్షంలో పడుకునే ఈ పద్ధతి మన నిద్ర నాణ్యతను నిజంగా పెంచుతుందో లేదో ఇప్పుడు వివరంగా చూద్దాం..
ఏమిటీ ఆస్ట్రోనాట్ స్లీప్?: దీనిని ‘తటస్థ శరీర భంగిమ’ అని కూడా అంటారు. అంతరిక్షంలో వ్యోమగాములు భారరహిత స్థితిలో నిద్రపోయే విధానం ఆధారంగా ఇది పనిచేస్తుంది. ఇక ఈ పద్ధతిలో మన శరీర పైభాగాన్ని, కాళ్లను కొద్దిగా పైకి ఎత్తి పడుకుంటారు. దీనివల్ల శరీరంపై పడే ఒత్తిడి సమానంగా పంపిణీ అయి, ప్రశాంతమైన నిద్ర పడుతుంది.
ఎలా ప్రయత్నించాలి?: ఈ భంగిమలో పడుకోవడానికి మీ తల, మోకాళ్లను గుండె స్థాయి కంటే రెండు మూడు అంగుళాలు పైకి ఉండేలా చూసుకోవాలి. ఇక దీనికోసం మార్కెట్లో ప్రత్యేకమైన సోఫాలు, కుర్చీలు లభిస్తాయి. ఒకవేళ అవి లేకపోయినా, ఇంట్లోనే తల కింద, మోకాళ్ల కింద తగినట్లుగా దిండ్లు అమర్చుకుని కూడా ఈ పద్ధతిని సులభంగా ప్రయత్నించవచ్చు.
ఎన్నో ఆరోగ్య ప్రయోజనాలు: ఇలా పడుకోవడం వల్ల వెన్నెముక, కీళ్లపై ఒత్తిడి గణనీయంగా తగ్గుతుంది. ముఖ్యంగా దీర్ఘకాలిక నడుము నొప్పితో బాధపడేవారికి ఇది మంచి ఉపశమనాన్ని ఇస్తుంది. ఇక అంతేకాకుండా ఎసిడిటీ, రాత్రివేళల్లో వచ్చే గురక మరియు ‘స్లీప్ ఆప్నియా’ వంటి శ్వాసకోశ సమస్యలను నివారించడంలో ఈ స్లీపింగ్ పొజిషన్ చాలా బాగా సహాయపడుతుంది.
ఇక మొదట్లో ఈ భంగిమ కొద్దిగా అసౌకర్యంగా అనిపించినా, అలవాటు పడితే మాత్రం నిద్రలేమి సమస్యలకు చెక్ పెట్టవచ్చు. ఇక రాత్రివేళ సరిగ్గా నిద్రపట్టక ఇబ్బందిపడేవారు ఈ ‘జీరో గ్రావిటీ స్లీప్’ పద్ధతిని ఒకసారి ప్రయత్నించి మంచి నిద్రను మీ సొంతం చేసుకోండి.
గమనిక: తీవ్రమైన వెన్నెముక లేదా ఇతర ఆరోగ్య సమస్యలు ఉన్నవారు ఈ కొత్త నిద్ర భంగిమను పాటించే ముందు డాక్టర్ లేదా ఫిజియోథెరపిస్ట్ సలహా తీసుకోవడం శ్రేయస్కరం.
