రాత్రి ఒంటిగంట దాటినా చేతిలో స్మార్ట్ఫోన్, కళ్ల నిండా బ్లూ లైట్, టేబుల్ మీద ఓ కాఫీ… నేటి యువతకు ఇది సాధారణ నైట్ లైఫ్స్టైల్గా మారిపోయింది. ప్రశాంతంగా సాగిపోతున్నట్లు కనిపించే ఈ అలవాట్ల వెనుక ఒక పెద్ద ఆరోగ్య ముప్పు దాగుంది. సాధారణంగా 20 ఏళ్ల వయసులో యవ్వనఛాయతో మెరిసిపోవాల్సిన చర్మం ఇప్పుడు వేగంగా తన వయసును కోల్పోతోంది. జెన్ జీ (Gen Z) యువతలో ఈ ఫాస్ట్ ఫార్వర్డ్ ఏజింగ్ ట్రెండ్ ఎందుకు పెరుగుతోందో, నిపుణులు ఏం చెబుతున్నారో ఇప్పుడు తెలుసుకుందాం.
ఒత్తిడి, కార్టిసాల్ ప్రభావం: చదువులు, ఉద్యోగాల్లో నిరంతరం ఉండే ఒత్తిడి వల్ల శరీరంలో ‘కార్టిసాల్’ అనే హార్మోన్ స్థాయిలు విపరీతంగా పెరుగుతాయి. ఈ హార్మోన్ చర్మాన్ని యంగ్గా, బిగుతుగా ఉంచే కొల్లాజెన్, ఎలాస్టిన్ అనే ప్రోటీన్లను లోపల నుంచే బలహీనపరుస్తుంది. ఇక దీనివల్ల గత తరాలతో పోలిస్తే ఇప్పటి యువతలో చాలా చిన్న వయసులోనే వృద్ధాప్య ఛాయలు కనిపిస్తున్నాయి.
బ్లూ లైట్, రాత్రిపూట జాగారాలు: ఫోన్లు, ల్యాప్టాప్ల నుంచి వచ్చే బ్లూ లైట్ చర్మానికి తీవ్ర హాని కలిగిస్తుంది. దీనికి తోడు రోజుకు కేవలం 4-5 గంటలు మాత్రమే నిద్రపోవడం వల్ల, పగటిపూట దెబ్బతిన్న చర్మ కణాలు తమను తాము బాగుచేసుకునే (రిపేర్) సమయం దొరకడం లేదు. ఇక ఫలితంగా ముఖంపై ముడతలు, పిగ్మెంటేషన్, మెడపై గీతలు వేగంగా వస్తున్నాయి.
లేట్ నైట్ స్నాక్స్, జంక్ ఫుడ్: అర్ధరాత్రి వేళల్లో ప్రాసెస్డ్ ఫుడ్, జంక్ స్నాక్స్, కెఫిన్ ఉన్న కాఫీలు ఎక్కువగా తీసుకోవడం చర్మ సౌందర్యాన్ని దెబ్బతీస్తోంది. ఇక ఈ ఆహార అలవాట్ల వల్ల చర్మంలోని సహజ ప్రోటీన్లు దెబ్బతిని ముఖంలో మెరుపు తగ్గిపోతుంది. అలాగే బయటకు వెళ్లేటప్పుడు సన్స్క్రీన్ వాడకపోవడం కూడా చర్మ రక్షణ కవచాన్ని దెబ్బతీస్తోంది.
యువతలో కనిపిస్తున్న ప్రధాన లక్షణాలు: ఈ జీవనశైలి మార్పుల వల్ల చిన్న వయసులోనే కళ్ల కింద నల్లటి వలయాలు (డార్క్ సర్కిల్స్), కళ్ల వాపు, కాంతిహీనమైన చర్మం స్పష్టంగా కనిపిస్తున్నాయి. యవ్వనంలో ఉండాల్సిన చర్మం వయసు మళ్లినట్లు కనిపిస్తుండటానికి ఈ రాత్రివేళ అలవాట్లే ప్రధాన కారణమని నిపుణులు హెచ్చరిస్తున్నారు.
అర్ధరాత్రి వరకు మేల్కొనడం, అనారోగ్యకరమైన ఆహారం తీసుకోవడం వల్ల తాత్కాలికంగా హాయిగా అనిపించినా చర్మానికి తీరని నష్టం జరుగుతుంది. సరైన సమయానికి నిద్రపోవడం, హెల్దీ ఫుడ్ తీసుకోవడం మరియు ఒత్తిడిని తగ్గించుకోవడం ద్వారానే మీ చర్మ సౌందర్యాన్ని, యవ్వనాన్ని కాపాడుకోవచ్చు.
గమనిక: ఈ సమాచారం సాధారణ అవగాహన కోసం మాత్రమే అందించబడింది. చర్మ సంబంధిత తీవ్రమైన సమస్యలు లేదా మార్పులు ఉన్నట్లయితే డెర్మటాలజిస్ట్ (చర్మ వైద్య నిపుణులను) సంప్రదించడం మంచిది.
