శ్రీకృష్ణాష్టమి వేడుకలంటేనే కంటికి ఇంపుగా ఉండే అలంకారాలు, నోరూరించే నైవేద్యాలు గుర్తొస్తాయి. ఆ చిన్నారి కృష్ణుడికి అటుకులు, పాలు, వెన్న, మీగడ అంటే ఎంతో ప్రీతి. మరి ఈ కృష్ణాష్టమికి ఆ గోపాలుడికి ఇష్టమైన పదార్థాలతో సులువగా ప్రసాదాలు ఎలా తయారు చేయాలో, పూజలో ఏమేం నైవేద్యాలు సమర్పించాలో ఇప్పుడు వివరంగా తెలుసుకుందాం..
కృష్ణునికి ప్రీతికరమైన ముఖ్యమైన నైవేద్యాలు: కృష్ణుడిని ‘మఖన్ చోర్’ అని పిలుస్తారు కాబట్టి తాజా వెన్నలో పటిక బెల్లం (మిశ్రి) కలిపి సమర్పిస్తారు. ఇక కుచేలుడి కథ ప్రకారం అటుకుల ప్రసాదం, ఆవు పాలు, పెరుగు, నెయ్యి, తేనె, పంచదారలతో చేసే పంచామృతం కృష్ణునికి అత్యంత ఇష్టం. వీటితో పాటు ధనియాల పంజిరి, పాయసం, సీజనల్ పండ్లను కూడా నివేదిస్తారు.
నోరూరించే అటుకుల లడ్డు – కావాల్సిన పదార్థాలు: రెండు కప్పుల అటుకులు, అయిదు చెంచాల నెయ్యి, జీడిపప్పు, బాదం పలుకులు, రెండు చెంచాల ఎండు కొబ్బరిపొడి, మూడు యాలకులు, ముప్పావు కప్పు తురిమిన బెల్లం మరియు మూడు చెంచాల కాచి చల్లార్చిన పాలు సిద్ధం చేసుకోవాలి.
అటుకుల లడ్డు ఎలా తయారు చేయాలి?: ముందుగా అటుకులను దోరగా వేయించి పక్కన పెట్టుకోవాలి. బాండీలో నెయ్యి వేసి జీడిపప్పు, బాదం, ఎండు కొబ్బరిపొడి వేయించాలి. ఇక చల్లారిన అటుకులను యాలకులతో కలిపి మెత్తగా గ్రైండ్ చేసి, ఆ తర్వాత బెల్లం తురుము వేసి మరోసారి మిక్సీ పట్టాలి. ఈ పొడిని వేయించిన డ్రైఫ్రూట్స్లో వేసి, మిగిలిన నెయ్యి, కొద్దిగా పాలు చిలకరిస్తూ లడ్డూలుగా చుట్టుకోవాలి.
ఇక చాలా తక్కువ సమయంలో, ఇంట్లోనే ఎంతో శుచిగా తయారుచేసుకునే ఈ ప్రసాదాలతో కృష్ణాష్టమి రోజు ఆ మురళీధరుని పూజించి ఆయన అనుగ్రహం పొందవచ్చు. ఇక ముఖ్యంగా మనం స్వామికి ఏ నైవేద్యం సమర్పించినా అందులో తప్పనిసరిగా తులసి దళం ఉంచడం మర్చిపోకూడదు.
