ఈరోజుల్లో చాలామంది పిల్లల్లో గోర్లు కొరికే అలవాటును మనం గమనిస్తూనే ఉంటాం. టీవీ చూస్తున్నప్పుడో, హోంవర్క్ చేస్తున్నప్పుడో తెలియకుండానే వేళ్లను నోట్లో పెట్టేసుకుంటారు. దీనిని నిపుణులు ‘అన్కంట్రోల్డ్ బైటింగ్’ అంటారు. అయితే పిల్లలను తిట్టకుండా లేదా కొట్టకుండా చాలా ప్రేమగా, కొన్ని చిన్న చిన్న ట్రిక్స్తో ఈ అలవాటును మాన్పించవచ్చు. ఆ సులువైన మార్గాలు ఏంటో ఈ రోజు క్లియర్గా తెలుసుకుందాం.
ప్రేమాస్పదంగా అర్థమయ్యేలా చెప్పండి: గోర్లు కొరికే పిల్లలను అస్సలు కొట్టడం లేదా తిట్టడం చేయకూడదు. అలా చేస్తే వాళ్లు మరింత మొండిగా మారే అవకాశం ఉంది. దానికి బదులుగా గోర్లు కొరకడం వల్ల అందులోని మట్టి, హానికర క్రిములు పొట్టలోకి వెళ్తాయని శాంతంగా వివరించాలి. ఇక గోళ్ల దగ్గర చర్మం దెబ్బతింటే ఇన్ఫెక్షన్లు వచ్చి జ్వరం వస్తుందని, డాక్టర్ దగ్గరకు వెళ్తే ఇంజెక్షన్లు ఇస్తారని ప్రేమగా అర్థమయ్యేలా చెప్పాలి.
క్రమం తప్పకుండా గోళ్లు కత్తిరించండి: పిల్లల చేతి, కాలి వేళ్ల గోళ్లను వారానికొకసారి క్రమం తప్పకుండా చిన్నగా కత్తిరిస్తూ ఉండాలి. ఇక వేళ్లకు గోళ్లు పొడవుగా లేకపోతే, వాళ్లు కొరకడానికి ట్రై చేసినా నోటికి గోళ్లు అందవు. దీనివల్ల కొద్దిరోజుల్లోనే వాళ్లకు ఆ అలవాటుపై దృష్టి తగ్గుతుంది.
చేతులకు వేరే పని చెప్పండి: పిల్లలు బోర్ కొట్టినప్పుడు లేదా ఖాళీగా ఉన్నప్పుడే ఎక్కువగా గోర్లు కొరుకుతుంటారు. అందుకే వాళ్ల చేతికి పట్టుకుని ఆడుకునే ఫిడ్జెట్ టాయ్స్ (Fidget Toys) లేదా చిన్న చిన్న ఆటబొమ్మలు ఇవ్వాలి. ఇక చేతిలో ఏదైనా వస్తువు ఉంటే వాళ్ల దృష్టి దానిపైకి మళ్లి గోర్లు కొరకడం మానేస్తారు.
బయట తిప్పండి – గమనిస్తూ ఉండండి: పిల్లలను ఎప్పుడూ ఇంట్లోనే కూర్చోబెట్టకుండా కాసేపు బయటకు తీసుకెళ్లి తోటి పిల్లలతో ఆడుకునేలా చేయాలి. వాళ్లు ఏ సమయంలో, ఎలాంటి సందర్భాల్లో గోర్లు కొరుకుతున్నారో వారి ప్రవర్తనను గమనించాలి. ఇక ఆ సమయంలో వాళ్లతో మాట్లాడుతూ, దృష్టిని వేరే వైపు మళ్లించే ప్రయత్నం చేయాలి.
ఇక పిల్లల్లో గోర్లు కొరికే అలవాటు సాధారణమే అయినప్పటికీ, కాస్త ఓపికగా మరియు ప్రేమగా వ్యవహరిస్తే ఈ సమస్యను సులభంగా అధిగమించవచ్చు. కొట్టడం కన్నా సరైన అవగాహన కల్పించడమే ఉత్తమమైన పరిష్కారం.
గమనిక: ఇది కేవలం పిల్లల ప్రవర్తన, ఆరోగ్యంపై అవగాహన కోసం అందించిన సమాచారం మాత్రమే. ఒకవేళ తీవ్రమైన మానసిక ఒత్తిడి లేదా ఇన్ఫెక్షన్ల వల్ల ఈ అలవాటు తగ్గకపోతే బాలల వైద్యులను లేదా చైల్డ్ సైకాలజిస్ట్ను సంప్రదించడం మంచిది.
