గుండెకు స్టెంట్ వేయించుకున్న తర్వాత మళ్లీ మునుపటిలా సాధారణ, చురుకైన జీవితాన్ని గడపవచ్చా లేదా అని చాలామంది భయపడుతుంటారు. నిజానికి యాంజియోప్లాస్టీ రక్తప్రసరణను మెరుగుపరిచి గుండెను కాపాడుతుంది. అయితే ఇది సమస్యను తాత్కాలికంగా సరిచేస్తుంది కానీ శాశ్వత నివారణ కాదు. సరైన జాగ్రత్తలు పాటిస్తే కొద్ది రోజుల్లోనే తేలికపాటి పనులు మొదలుపెట్టవచ్చు. మరి ఆ కోలుకునే కాలక్రమం, పాటించాల్సిన నియమాలు ఏంటో ఇప్పుడు వివరంగా చూద్దాం..
కోలుకోవడానికి ఎంత సమయం పడుతుంది?: స్టెంట్ వేసిన తర్వాత సాధారణంగా 1 నుండి 2 వారాల్లో రోజువారీ తేలికపాటి పనులు ప్రారంభించవచ్చు. కానీ గుండె మునుపటికంటే బలంగా మారి, శరీరం పూర్తిగా కోలుకోవడానికి 4 నుండి 6 వారాల సమయం పడుతుంది. ఇక మొదటి 2-3 రోజులు విశ్రాంతి తీసుకోగా, వారం తర్వాత డెస్క్ జాబ్స్ చేసేవారు ఆఫీసుకు వెళ్లవచ్చు.
స్టెంట్ తర్వాత నడక మరియు వ్యాయామం: పరిస్థితి స్థిరంగా ఉన్నప్పుడు నెమ్మదిగా నడవడం ప్రారంభించవచ్చు. మొదట కొద్దిసేపు నడిచి, ఎలాంటి ఇబ్బంది లేకపోతే క్రమంగా నడిచే సమయాన్ని పెంచుకోవచ్చు. ఇక గుండెపోటు తర్వాత స్టెంట్ వేయించుకున్నవారు మాత్రం వైద్యుల సూచనతో ‘కార్డియాక్ రిహాబిలిటేషన్’ లో చేరి సురక్షితంగా వ్యాయామం చేయడం మంచిది.
ఏ పనులు చేయొచ్చు? ఏవి చేయకూడదు?: ఇంట్లో చిన్నచిన్న పనులు చేసుకోవడం, నెమ్మదిగా నడవడం వంటివి చేయవచ్చు. ఇక అయితే మొదట్లో బరువులు ఎత్తడం, వేగంగా పరిగెత్తడం, ఎక్కువ మెట్లు ఎక్కడం వంటి అధిక శ్రమతో కూడిన పనులకు దూరంగా ఉండాలి. మణికట్టు లేదా తొడ భాగంలో కాథెటర్ పెట్టిన చోట ఎక్కువ ఒత్తిడి పడకుండా చూసుకోవాలి.
మందుల వాడకం చాలా ముఖ్యం: స్టెంట్ వద్ద రక్తం గడ్డకట్టకుండా ఉండటానికి డాక్టర్లు మందులను సూచిస్తారు. ఇక వీటిని వైద్యుల సలహా లేకుండా ఏ క్షణంలోనూ నిలిపివేయకూడదు. క్రమం తప్పకుండా మందులు వాడుతూ ఆరోగ్యకరమైన జీవనశైలిని పాటించడం చాలా అవసరం.
గుండెకు స్టెంట్ పడటం అనేది జీవితానికి ముగింపు కాదు, ఒక కొత్త ఆరంభం. డాక్టర్ చెప్పిన సూచనలు పాటిస్తూ, సరైన ఆహారం మరియు తేలికపాటి శారీరక శ్రమతో సురక్షితంగా మళ్లీ మీ సాధారణ జీవితాన్ని సంతోషంగా గడపవచ్చు.
గమనిక: ఈ సమాచారం కేవలం అవగాహన కోసం మాత్రమే అందించబడింది. హార్ట్ ఎటాక్ తీవ్రతను బట్టి ఒక్కొక్కరి కోలుకునే సమయం మారవచ్చు. కాబట్టి బరువైన పనులు లేదా వ్యాయామాలు ప్రారంభించే ముందు తప్పనిసరిగా మీ కార్డియాలజిస్ట్ అనుమతి తీసుకోండి.
