ప్రతి రోజు ఇంట్లో పూజల కోసం అగరబత్తీలు వెలిగించడం లేదా దోమల నివారణకు మస్కిటో కాయిల్స్ వాడటం మనలో చాలామందికి అలవాటు. అయితే వీటి పొగ వల్ల క్యాన్సర్ వస్తుందనే వార్తలు తరచూ ప్రచారంలోకి రావడంతో చాలామంది భయాందోళనకు గురవుతున్నారు. నిజంగానే అగరబత్తీలు, మస్కిటో కాయిల్స్ పొగ వల్ల క్యాన్సర్ వస్తుందా? దీనిపై ఆరోగ్య నిపుణులు ఏం చెబుతున్నారో ఇప్పుడు వివరంగా తెలుసుకుందాం..
క్యాన్సర్ వస్తుందనడానికి ఆధారాలు ఉన్నాయా?: అగరబత్తీలు లేదా మస్కిటో కాయిల్స్ను అప్పుడప్పుడు పరిమితంగా వాడటం వల్ల క్యాన్సర్ వస్తుందనేందుకు ఎలాంటి బలమైన ఆధారాలు లేవని ఆరోగ్య నిపుణులు స్పష్టం చేస్తున్నారు. సాధారణంగా క్యాన్సర్ అనేది జెనెటిక్స్, మద్యపానం, తీవ్రమైన ఊబకాయం మరియు సరికాని జీవనశైలి వంటి అనేక ప్రధాన కారణాల వల్ల వస్తుంది.
గాలి వెలుతురు లేని గదుల్లో వాడితే ప్రమాదం: అయితే క్లోజ్డ్ రూమ్స్ (కిటికీలు, తలుపులు పూర్తిగా మూసివేసిన గదులు) లో వీటిని ఎక్కువగా వాడటం మంచిది కాదు. ఇక గాలి వెలుతురు సరిగ్గా ఆడని ప్రదేశాల్లో రోజూ వీటి పొగను పీల్చడం వల్ల శ్వాసకోశ వ్యవస్థపై ప్రతికూల ప్రభావం పడుతుందని పలు అధ్యయనాలు వెల్లడించాయి.
ఏ విధమైన జాగ్రత్తలు తీసుకోవాలి?: ఇంట్లో అగరబత్తీలు లేదా మస్కిటో కాయిల్స్ వెలిగించినప్పుడు గదిలో గాలి ధారాళంగా ఆడేలా చూసుకోవాలి. ఇక కిటికీలను తెరిచి ఉంచడం వల్ల పొగ ఒకేచోట పోగుపడకుండా బయటకు వెళ్ళిపోతుంది. ముఖ్యంగా ఆస్తమా, శ్వాసకోశ సమస్యలు ఉన్నవారు మరియు చిన్న పిల్లలు ఉన్న గదుల్లో పొగ ఎక్కువగా లేకుండా చూసుకోవడం శ్రేయస్కరం.
అగరబత్తీల పొగ వల్ల నేరుగా క్యాన్సర్ వస్తుందని భయపడాల్సిన అవసరం లేదు. కానీ శ్వాసకోశ ఆరోగ్యం దృష్ట్యా పొగ ఒకే చోట పేరుకుపోకుండా వెంటిలేషన్ సరిగ్గా ఉండేలా చూసుకుంటూ పరిమితంగా వాడటం మంచిది.
గమనిక: ఈ సమాచారం ఆరోగ్య నిపుణుల విశ్లేషణలు మరియు అధ్యయనాల ఆధారంగా అవగాహన కోసం మాత్రమే అందించబడింది. మీకు తీవ్రమైన శ్వాసకోశ లేదా అలర్జీ సమస్యలు ఉంటే వైద్యులను సంప్రదించండి.
