యూట్యూబ్ వీడియోలు చూసే చాలా మంది వీక్షకులకు హర్షసాయి సుపరిచితుడే. హీరో రేంజ్లో ఫ్యాన్ బేస్ ఉన్న హర్షసాయి ఈ మధ్య వరుస వివాదాల్లో చిక్కుకుంటున్న విషయం తెలిసిందే. మొన్నటివరకు తన వీడియోల్లో జూదానికి సంబంధించిన ప్రమోషన్స్ మీద వివాదాస్పద వ్యాఖ్యలు చేయటం చర్చనీయాంశంగా మారితే.. ఇప్పుడు తనపై బిగ్ బాస్ కార్యక్రమంతో వెలుగులోకి వచ్చిన ఓ నటి లైంగిక ఆరోపణలు చేయటంతో పోలీసులు కేసు నమోదు చేసిన విషయం తెలిసిందే.
అయితే ఆ నటి ఫిర్యాదు మేరకు.. సెప్టెంబర్ 24న పోలీసులు కేసు నమోదు చేయగా.. అప్పటి నుంచి హర్ష సాయి పరారీలోనే ఉండటం గమనార్హం. పోలీసులు హర్షసాయిపై లుక్ అవుట్ నోటీసులు కూడా జారీ చేశారు. హర్షసాయి తెలంగాణ హైకోర్టును ఆశ్రయించాడు. ఈ కేసులో తనకు ముందస్తు బెయిల్ మంజూరు చేయాలంటూ హైకోర్టులో పిటిషన్ దాఖలు చేశాడు. హైకోర్టులో తాజాగా ఊరట లభించింది. లైంగిక వేధింపుల ఆరోపణల ఎదుర్కొంటున్న యూట్యూబర్ హర్షసాయికి ముందస్తు బెయిల్ మంజూరు చేస్తూ న్యాయస్థానం తీర్పును ఇచ్చింది.
