నటసింహం నందమూరి బాలకృష్ణ ప్రస్తుతం భగవంత్ కేసరి సినిమా సక్సెస్లో ఫుల్ ఖుష్ ఉన్నారు. మరోవైపు తన నెక్స్ట్ సినిమాలపై ఫోకస్ పెట్టారు. తాజాగా భగవంత్ కేసరి మూవీ సక్సెస్ మీట్ను హైదరాబాద్లో నిర్వహించారు. ఈ ఈవెంట్లో బాలయ్య తన ఫ్యాన్స్కు అద్దిరిపోయే న్యూస్ చెప్పారు. అదేంటంటే..? త్వరలోనే ఆయన బాలీవుడ్లో ఎంట్రీ ఇవ్వబోతున్నట్లు చెప్పారు. బాలయ్య బాలీవుడ్ ఎంట్రీ అనగానే ఫ్యాన్స్ ఫుల్ ఖుష్ అవుతున్నారు.
అయితే బాలకృష్ణ నేరుగా బాలీవుడ్ సినిమా చేయడం లేదు. భగవంత్ కేసరి మూవీ బాలీవుడ్లో డబ్ అవుతున్న విషయం తెలిసిందే. అయితే ఈ సినిమాలో తన పాత్రకు హిందీ డబ్బింగ్ తానే చెప్పుకున్నారట. బాలయ్య వాయిస్లో హిందీ మాస్ డైలాగ్స్ అంటే ఇక థియేటర్లు బద్ధలవ్వాల్సిందేనని ఫ్యాన్స్ అంటున్నారు. ఈ సినిమా హిందీ వెర్షన్ను చూడటానికి చాలా ఉత్సాహంగా ఎదురుచూస్తున్నట్లు నెట్టింట కామెంట్లు చేస్తున్నారు.
అయితే ఈ సక్సెస్ మీట్లో బాలయ్య మాట్లాడుతూ.. తనకు తన తండ్రి ఎన్టీఆర్కు ప్రయోగాలంటే చాలా ఇష్టమని చెప్పుకొచ్చారు. అందుకే తాను తన పాత్రకు హిందీలో డబ్బింగ్ చెప్పుకున్నట్లు వెల్లడించారు. హిందీలో డబ్బింగ్ చెప్పడం ఇదే తొలిసారని.. ఈ సినిమాతో హిందీపై తనకున్న పట్టును ప్రేక్షకులు చూస్తారని అన్నారు.
