బాలీవుడ్ హీరోలు, దర్శకులు టాలీవుడ్ కథలపై మనసు పారేసుకుంటున్నారు. ముఖ్యంగా బీ-టౌన్ హీరోలు తెలుగు దర్శకులతో సినిమాలు చేయాలని తపిస్తున్నారు. ఇటీవలే కార్తికేయ-2 మూవీతో పాన్ ఇండియా ప్రశంసలు అందుకున్న డైరెక్టర్ చందూ మొండేటి. చిన్న సినిమాగా విడుదలైన ఈ చిత్రం మంచి విజయం సాధించింది. ఎక్కువ ప్రమోషన్స్ కూడా చేయకుండానే 100 కోట్లకు పైగా వసూళ్లు చేసి ఊహించని రికార్డు అందుకుంది.
ఈ టాలెంటెడ్‌ డైరెక్టర్‌కు వరుస ఆఫర్లు వస్తున్నాయి. ప్రస్తుతం ఈ దర్శకుడు పాన్ ఇండియా ఫిల్మ్‌ చేయడానికి ఆసక్తిగా ఉన్నట్లు తెలుస్తోంది. ఇప్పటికే దానికి సంబంధించిన కథను సిద్ధం చేసుకున్నారట. బాలీవుడ్‌కు చెందిన ఒకరిద్దరు బడా హీరోలతో ఈ సినిమా తీయనున్నారనే వార్తలు చక్కర్లు కొడుతున్నాయి.
‘కార్తికేయ2’ తర్వాత అల్లు అరవింద్‌ గీతా ఆర్ట్స్‌తో ఓ సినిమా చేసేందుకు చందూ మొండేటి చర్చలు జరిపారని టాక్‌. ఇక ఈ సినిమాలో హీరోలుగా బాలీవుడ్ హీరోలు హృతిక్ రోషన్, రణ్‌బీర్‌ కపూర్‌ పేర్లు వినిపిస్తున్నప్పటికీ హృతిక్‌నే ఫైనల్‌ చేసే అవకాశమున్నట్లు సమాచారం. ఇదే నిజమైతే టాలీవుడ్ దర్శకుడు బాలీవుడ్ హీరో కాంబినేషన్‌లో త్వరలోనే ఓ సినిమా ప్రేక్షకులను అలరించడానికి సిద్ధమవుతుంది. దీనిపై అటు గీతా ఆర్ట్స్‌ కానీ, ఇటు చందూ మొండేటీ కానీ ఇంకా ఎలాంటి అధికారిక ప్రకటన చేయలేదు.
