దేవీ శ్రీ ప్రసాద్.. ఈ పేరు వింటే తెలుగు సినీ ప్రేక్షకులకు వచ్చే వైబ్స్ వేరు! తన పాటలతో, సంగీతంతో అభిమానుల్లో ఎనర్జీని నింపే టాలెంటెడ్ మ్యూజిక్ డైరక్టర్గా.. ఇప్పటికే తనకంటూ ప్రత్యేక స్థానాన్ని ఏర్పాటు చేసుకున్నాడు దేవీ. మాస్‌ అయినా, మెలొడీ అయినా.. దేశీ అయినా, వెస్ట్రన్‌ అయినా.. నాటు అయినా, బీట్ అయినా.. ఐటెమ్‌ పాటకి అసలైన నిర్వచనం చెప్పాడీ రాక్స్టార్ డీఎస్పీ. నేడు ఈయన పుట్టినరోజు సందర్భంగా ప్రత్యేక కథనం మీకోసం..
దేవిశ్రీప్రసాద్‌ తండ్రి గొర్తి సత్యమూర్తి దాదాపు 100సినిమాలకు పైగా కథ, సంభాషణలు అందించారు. అభిలాష, ఛాలెంజ్‌, పెదరాయుడు, చంటి లాంటి ఎన్నో హిట్‌ చిత్రాలు ఆయన ఖాతాలో ఉన్నాయి.
అభిమానులు దేవీశ్రీని ‘రాక్స్టార్’గా పిలుచుకుంటారు. తెలుగు చిత్రాలతో కలిపి దాదాపు 100 చిత్రాలకు పైగా ఆయన సంగీతమందించారు. సంగీత దర్శకుడిగానే కాకుండా, గాయకునిగా 60పాటలు పాడారు. దాదాపు 20పాటలకు సాహిత్యమందించారు.
దేవీశ్రీప్రసాద్‌ కుమారి ’21ఎఫ్'(2015) చిత్రంలో ‘బ్యాంగ్‌ బ్యాంగ్‌ బ్యాంకాక్‌’ పాటకు కొరియోగ్రాఫర్‌గా పనిచేశారు. ఒక పాటకు ఆయనే సంగీతమందించి, ఆలపించి, నృత్యాన్ని సమకూర్చడం అదే తొలిసారి. అంతే కాకుండా ఎనిమిది చిత్రాలలో అతిథి పాత్రలో కనిపించారు.
‘శంకర్‌దాదా ఎమ్‌బీబీఎస్’(2003) ఆల్బమ్ భారీ విజయం సాధించినపుడు, ఒక విజయోత్సవ సభలో మెగాస్టార్‌ చిరంజీవి దేవీశ్రీ ప్రసాద్‌ని ప్రశంసించి వాచీ బహుకరించారు. తనకు లభించిన అతి పెద్ద ప్రశంస గా డీఎస్పీ దాన్ని ఇప్పటికీ పేర్కొంటారు.
ప్రముఖ దర్శకుడు సుకుమార్‌ రచయితగా, దిల్‌రాజు సమర్పణలో దేవిశ్రీ హీరోగా 2019లో ఒక కథ సిద్ధమయ్యింది. అయితే చర్చల దశలోనే ఆ ప్రాజెక్టు ఆగిపోయింది. కొన్ని సినిమాల్లో అతిథి పాత్రలు, మ్యూజిక్ వీడియోల ద్వారా దేవీశ్రీప్రసాద్‌ నటుడిగానూ ప్రేక్షకులకు సుపరిచితమే.
‘ఆర్య2’లోని ‘రింగ రింగ’ పాటని అన్ని భాషల్లో రీమేక్‌ చేశారు. ఇంకా ఆ అంటే అమలాపురం, కెవ్వుకేక, డియ్యాలో డియ్యాలో విపరీతమైన ప్రజాదరణ పొందాయి. ఇటీవల దేశవ్యాప్తంగా వినిపించిన ‘ఊ అంటావా మామా’ పాట దేవీశ్రీ స్వరపరిచిందే.
‘స్పెషల్‌ కాన్సెర్ట్‌’ పేరిట విదేశాల్లో దేవిశ్రీ ఎన్నో ప్రదర్శనలు ఇచ్చారు. 2014 జులై 26న ఇల్లినాయిస్‌లోని అరెనాలో దేవిశ్రీ ఇచ్చిన సంగీత ప్రదర్శనకుగాను, ఆ రాష్ట్ర గవర్నర్‌ ఆ రోజును ‘డీఎస్పీ డే ఇన్‌ ఇల్లినాయిస్‌’గా ప్రకటించారు. ఆ అరుదైన గౌరవం దక్కించుకున్న సంగీతకారుల్లో దేవిశ్రీప్రసాద్‌ ఒకరు.
ఇవే కాకుండా ‘జీ తమిళం’లో ప్రసారమయ్యే ‘రాక్స్టార్’ కార్యక్రమానికి దేవీశ్రీ ప్రధాన న్యాయనిర్ణేతగా వ్యవహరిస్తున్నారు. 2021లో ప్రారంభమైన ఈ కార్యక్రమం సీజన్‌1 ప్రేక్షకులను విశేషంగా అలరించింది. ఓటీటీ వేదికగా జీ5 లో ప్రస్తుతం ప్రసారం అవుతోంది. టెలివిజన్‌ వేదికగా ప్రసారమయ్యే సంగీత ప్రధాన కార్యక్రమాలకు డీఎస్పీ అతిథిగా హాజరయ్యారు. అందులో ‘పాడుతా తీయగా’ లాంటి ప్రేక్షకాదరణ పొందిన కార్యక్రమాలు ఉన్నాయి.
