నేచురల్ స్టార్ నాని నటించిన సినిమాలకు ఇటీవల కాలంలో కలిసి రావడం లేదా? అనే సందేహాలు వ్యక్తం చేస్తున్నారు సినీ పరిశీలకులు. మరీ ముఖ్యంగా ఆయన సినిమాలకు బాలీవుడ్ లో అంతగా ఆదరణ లభించడం లేదని విశ్లేషిస్తున్నారు. వివరాల్లోకెళితే..ఇటీవల కాలంలో నాని నటించిన రెండు సినిమాలు బాలీవుడ్ లో రీమేక్ అయ్యాయి. ఆ రెండు పిక్చర్స్ కూడా బాలీవుడ్ లో ఆకట్టుకోలేకపోయాయి.
నాని నటించిన ‘అంటే సుందరానికి’ ఫిల్మ్ కు తెలుగులో చక్కటి ఆదరణ లభిస్తోంది. కాగా, నాని నటించిన ‘జెర్సీ’ని హిందీలో షాహిద్ కపూర్ హీరోగా రీమేక్ చేశారు. కానీ, అది అనుకున్న స్థాయిలో ఆడలేదు. తాజాగా విడుదలైన ‘నికమ్మ’ కూడా అంతగా ఆకట్టుకోవడం లేదని తెలుస్తోంది.
నాని, సాయిపల్లవి జంటగా నటించిన ‘‘MCA’’ తెలుగులో బాగానే ఆడింది. ఇదే మూవీని బాలీవుడ్ లో రీమేక్ చేశారు. అహ్మద్ ఖాన్ ఈ సినిమాను అక్కడ రీమేక్ చేయగా, అందులో సీనియర్ హీరోయిన్ శిల్పా శెట్టి కీలక పాత్ర పోషించింది.
తెలుగులో భూమిక పోషించిన పాత్రను శిల్ప పోషించింది. అభిమన్యు దాసాని హీరో కాగా, షెర్లీ సెటియా హీరోయిన్. అయితే, ఈ సినిమాకు ఆదరణ అంతగా లభించడం లేదని సమాచారం అందుతోంది. అలా మొత్తంగా నాని సినిమాలకు బాలీవుడ్ లో కలిసి రావడం లేదనే అభిప్రాయాన్ని పలువురు వ్యక్తం చేస్తున్నారు.
