సినిమా టికెట్ రేట్లపై, అదనపు షోలపై తెలంగాణ హైకోర్టు అసంతృప్తి తెలిపింది. బెనిఫిట్ షోలు రద్దు చేశామంటూ పరోక్షంగా ప్రత్యేక షోలకు అనుమతి ఇవ్వడం ఏంటని ప్రశ్నించింది హైకోర్టు. అర్ధరాత్రి ఒంటిగంట దాటిన తర్వాత షోలకు అనుమతి ఇవ్వడంపై పునఃసమీక్షించాలని హోంశాఖ ప్రత్యేక ప్రధాన కార్యదర్శిని ఆదేశించింది హైకోర్టు. తదుపరి విచారణ ఈనెల 24వ తేదీకి వాయిదా వేసింది.
ప్రేక్షకుల భద్రతను దృష్టిలో ఉంచుకొని బెనిఫిట్, ప్రత్యేక షోలకు అనుమతించవద్దని హైకోర్టు సూచించింది. నిర్మాత భారీ బడ్జెట్ తో సినిమాలు తీసి ప్రేక్షకుల నుంచి వసూలు చేసుకోవడం సరైంది కాదని వ్యాఖ్యానించింది. ఇటీవల పుష్ప-2 ప్రీమియర్ షో సందర్భంగా ఆర్టీసీ క్రాస్ రోడ్డులోని సంధ్య థియేటర్ వద్ద తొక్కిసలాట జరిగిన విషయం తెలిసిందే. ఈ నేపథ్యంలో అసెంబ్లీలో సీఎం రేవంత్ రెడ్డి, సినిమాటోగ్రఫీ మంత్రి కోమటిరెడ్డి వెంకట్ రెడ్డి బెనిఫిట్ షోలకు అనుమతి ఇవ్వమని ప్రకటించి.. తాజాగా గేమ్ ఛేంజర్ మూవీకి అనుమతి ఇచ్చింది ప్రభుత్వం.
