ఫ్రెండ్స్ మీరు ఎప్పుడైనా గమనించారా? హెయిర్ కటింగ్ చేయించుకుని రాగానే అమ్మ గానీ, నాన్నమ్మ గానీ గడప బయటే ఆపేస్తారు. “అక్కడే ఉండు.. లోపలికి రాకు.. ముందే స్నానం చేసి రా!” అని కంపాస్ కొట్టినట్లు చెబుతారు. అప్పట్లో ఏదో కోపంగా అనిపించినా, మన భక్తి సంప్రదాయం వెనుక, అలాగే సైన్స్ వెనుక చాలా బలమైన కారణాలే ఉన్నాయి. అవేంటో ఇప్పుడు మనం వివరంగా ముచ్చటించుకుందాం..
అపవిత్రత అంటే ఏంటి?: మన శాస్త్రాల ప్రకారం శరీరంలో నుంచి వేరుపడిన గోర్లు కానీ, వెంట్రుకలు కానీ ‘నిర్జీవమైనవి’. అంటే అవి ప్రాణం లేని వ్యర్థాలు. జుట్టు కత్తిరించినప్పుడు మన ఒంటి మీద చాలా చిన్న చిన్న వెంట్రుకలు పడతాయి. వాటిని అలాగే ఉంచుకుని ఇంట్లోకి వస్తే, ఆ అపవిత్రత లేదా నెగటివ్ ఎనర్జీ ఇల్లంతా వ్యాపిస్తుందని మన పెద్దల నమ్మకం. ముఖ్యంగా దేవుడి గదిలోకి లేదా వంటగదిలోకి అస్సలు వెళ్లనివ్వరు.
ఆరోగ్యం వెనుక అసలు రహస్యం: ఇక పోతే, దీని వెనుక సైంటిఫిక్ రీజన్ కూడా ఉంది తెలుసా? మనం హెయిర్ కటింగ్ చేయించుకున్నప్పుడు ఆ కత్తెరలు లేదా రేజర్లు అందరికీ వాడుతుంటారు. పైగా కట్ అయిన చిన్న చిన్న వెంట్రుకలు చాలా పదునుగా ఉంటాయి. అవి మన చర్మం మీద ఉండిపోతే దురద వస్తుంది, లేదా అనుకోకుండా అవి ఆహారంలో పడితే కడుపులోకి వెళ్లే ప్రమాదం ఉంది.
మీకు తెలుసా? ఆ చిన్న జుట్టు ముక్కలు కంటికి కూడా సరిగ్గా కనిపించవు. అందుకే స్నానం చేస్తేనే అవి పూర్తిగా వదిలిపోతాయి. చర్మ వ్యాధులు రాకుండా ఉండాలన్నా, ఇంట్లో శుభ్రత ఉండాలన్నా ఈ నియమం చాలా ముఖ్యం.
స్నానం ఒక శుద్ధి: పూర్వం సెలూన్లు ఉండేవి కావు, ఇంటి బయట చెట్టు కింద కటింగ్ చేసేవారు. కటింగ్ అయ్యాక వెంటనే బావి దగ్గరో, చెరువు దగ్గరో స్నానం చేసి ఇంటికి వచ్చేవాళ్లు. అది మనల్ని మనం శుద్ధి చేసుకోవడం అన్నమాట.
ఇక మన పూర్వీకులు ఏ నియమం పెట్టినా అందులో మన మంచే ఉంది. హెయిర్ కటింగ్ అయ్యాక స్నానం చేయడం అనేది కేవలం పద్ధతి మాత్రమే కాదు, అది మన ఆరోగ్యం కోసం, ఇంటి పరిశుభ్రత కోసం చేసే ఒక మంచి పని.
గమనిక : ఇక్కడ మనం చెప్పుకున్న విషయాలు సమాజంలో ఉన్న నమ్మకాలు మరియు సంప్రదాయాల మీద ఆధారపడి సేకరించినవి. వీటిని పాటించడం అనేది పూర్తిగా మీ వ్యక్తిగత ఇష్టం మరియు మీ కుటుంబ ఆచారాల మీద ఆధారపడి ఉంటుంది.
