ఉత్తర ప్రదేశ్ ఆగ్రాలో ఒక వింత ఘటన వెలుగులోకి వచ్చింది. 22 ఏళ్ల ఒక యువకుడు 60 ఏళ్ళ మామ్మ గారితో ప్రేమలో పడ్డాడు. అవును అండీ బాబు నిజం ఇది. ఆమె ఏడుగురు పిల్లలకు తల్లి, ఏడుగురు పిల్లలకు అమ్మమ్మ. ఈ వింత ప్రేమ కథ, ఎట్మదుద్దౌలా పోలీస్ స్టేషన్ పరిధిలోని ప్రకాష్ నగర్ లో వెలుగులోకి వచ్చింది. అసలు ఈ ప్రేమ కథ ఏ విధంగా బయటకు వచ్చింది అనేది చూస్తే,
60 ఏళ్ల వృద్దురాలి భర్త, ఒక యువకుడిపై కేసు పెట్టేందుకు పోలీస్ స్టేషన్ కి వచ్చారు. తన మీద కేసు పెట్టాలని ప్రయత్నిస్తున్నట్టు తెలుసుకున్న ఆ యువకుడు కూడా పోలీస్ స్టేషన్ కి వచ్చాడు. తరువాత పోలీస్‌స్టేషన్‌లో ఇరువర్గాల మధ్య వివాదం నెలకొంది. ఈ గొడవలో వృద్దురాలు యువకుడు ఇద్దరూ ఊహించని షాక్ ఇచ్చారు. తాము పెళ్లి చేసుకోవాలని కోరుకుంటున్నట్టు చెప్పారు.
దీనితో కుటుంబ సభ్యులు జోక్యం చేసుకుని వారిని వారించే ప్రయత్నం చేసారు. ఏ విధంగా చూసినా సరే మీ బంధాన్ని అంగీకరించేది లేదని వారు స్పష్టం చేసారు. పోలీసులు కూడా ఈ జంటకు తమ మనసు మార్చుకోవాల్సిన అవసరం ఉందని, వారి ప్రేమను కొనసాగించవద్దని సూచించారు. అయితే వాళ్ళు వెనక్కు మాత్రం తగ్గలేదు. దీనితో అక్కడ ఘర్షణ వాతావరణం సృష్టించినందుకు గాను యువకుడిపై పోలీసులు కేసు నమోదు చేసారు.
