ఎండలు మండిపోతున్నాయి. రోజురోజుకు ఉష్ణోగ్రతలు పెరిగిపోతున్నాయి. ఒక్క క్షణం ఫ్యాన్, కూలర్ లేకుండా ప్రజలు జీవించలేకపోతున్నారు. ఉదయం 9 నుంచే ఏసీలు ఆన్ చేసేస్తున్నారు. దీంతో విద్యుత్ వినియోగం భారీగా పెరిగిపోయింది. హైదరాబాద్ లో గురువారం రోజున రికార్డు స్థాయిలో విద్యుత్ వినియోగం నమోదైనట్లు ఎస్పీడీసీఎల్ సీఎండీ ముషారఫ్ ఫరూఖి తెలిపారు. గత మూడేళ్ల డిమాండ్తో పోలిస్తే ఈ ఏడాది 16 నుంచి 20 శాతం విద్యుత్ డిమాండ్ పెరిగిందని చెప్పారు.
గతేడాది మే 19వ తేదీన 3,756 మెగావాట్ల గరిష్ట డిమాండ్ నమోదు కాగా ఈ ఏడాది ఏప్రిల్ 1వ తేదీనే 3,832 గా నమోదయి గతేడాది మే నెల రికార్డును అధిగమించింది. గత మూడేళ్లుగా డిమాండ్ పరిశీలిస్తే ప్రతి ఏటా విద్యుత్ డిమాండ్ పెరిగిపోతుంది. 2024లో మార్చ్లో 72.02 మిలియన్ యూనిట్లు, ఏప్రిల్లో నేటి వరకు 78.55 మిలియన్ యూనిట్ల గరిష్ఠ డిమాండ్ నమోదైనట్లు అధికారులు తెలిపారు. మరోవైపు ఈ సీజన్లో అంచనాలకు మించి విద్యుత్ వినియోగం డిమాండ్ పెరిగినా ఎలాంటి ఇబ్బందులు లేకుండా నిరంతర విద్యుత్ సరఫరా కొనసాగిస్తామని ఎస్పీడీసీఎల్ సీఎండీ ముషారఫ్ ఫరూఖి ధీమా వ్యక్తంచేశారు.
