జగన్, మీరు తోడు దొంగలు – అమరావతిలో సోము వీర్రాజుకు షాకిచ్చిన రైతు !

రాజధాని గ్రామాల్లో భాజపా ఏపీ రాష్ట్ర అధ్యక్షుడు సోము వీర్రాజుకు చేదు అనుభవం ఎదురైంది. పాదయాత్ర చేస్తున్న ఆయన ఓ రైతుతో ముచ్చటించారు. ఆ రైతు అన్న మాటకు ఆయన మైండ్ బ్లాక్ అయింది. ఇంతకీ ఆ కర్షకుడు సోము వీర్రాజుతో ఏమన్నాడంటే..

“మన అమరావతి బీజేపీ సంకల్ప యాత్ర”ను ఆంధ్రప్రదేశ్ భారతీయ జనతాపార్టీ అధ్యక్షుడు సోమువీర్రాజు ఉండవల్లిలో ప్రారంభించారు. ఆగస్టు నాలుగో తేదీ సాయంత్రం తుళ్లూరులో యాత్రను ముగించనున్నారు.ఈ పాదయాత్రలో భాగంగా పెనుమాక వెళ్లిన సోము వీర్రాజు అక్కడ రాజధానికి భూములు ఇచ్చిన రైతులతో మాట్లాడారు.

తమకు అధికారం ఇస్తే సంవత్సరంలో రాజధాని నిర్మిస్తామని రైతులకు సోమువీర్రాజు హామీ ఇచ్చారు. అయితే అక్కడే ఉన్న పెనుమాకకు చెందిన వృద్ధ రైతు సోము వీర్రాజుతో వాగ్వాదానికి దిగారు. జగన్, మీరు కలిసి తోడు దొంగలై రాజధానిని సర్వనాశనం చేశారని మొహం మీదనే చెప్పేశారు. ఆ రైతుకు సర్ది చెప్పాలని సోము వీర్రాజు ప్రయత్నించారు కానీ ఆయన వినిపించుకోలేదు. దీంతో సోము వీర్రాజు ముందుకెళ్లిపోయారు.

సోము వీర్రాజును పెనుమాక రైతు ప్రశ్నిస్తున్న వీడియో సోషల్ మీడియాలో వైరల్‌గా మారింది. పలువురు తెలుగుదేశం పార్టీ నేతలు.. ఇతరులు విస్తృతంగా షేర్ చేస్తున్నారు.