ఇటీవలి కాలంలో బ్యాటరీ వెహికల్స్‌ వరుసగా ప్రమాదానికి గురవుతున్న విషయం తెలిసిందే. ఉన్నట్టుండి బ్యాటరీస్ హీట్ అవ్వడం.. మంటలు రావడం, ఆ వెంటనే బైక్ కాలిపోవడం వంటి వరుస ప్రమాదాలను తరచూ వీక్షిస్తూనే ఉన్నాం. తాజాగా హైదరాబాద్‌లోని రామాంతపూర్‌లో మరో ఎలక్ట్రిక్ ద్విచక్ర వాహనం బ్యాటరీ ఒక్కసారిగా పేలిపోయింది.
దీంతో ఆ బైకు పార్క్ చేసిన ఇంట్లో భారీ అగ్ని ప్రమాదం చోటుచేసుకుంది. అంతేకాకుండా పార్కింగ్‌లో ఉన్న మరో 8 ద్విచక్ర వాహనాలకు మంటలు వ్యాపించాయి. దీంతో మంటల్లో 8 బైకులు దగ్ధమయ్యాయి. తెల్లవారుజామున మూడు గంటలకు ఈ ఘటన చోటుచేసుకోగా.. మంటలను అదుపు చేసేందుకు స్థానికులు ప్రయత్నించారు. అప్పటికే బైకులు పూర్తిగా దగ్ధమయ్యాయి. స్థానికుల ఫిర్యాదుతో కేసు నమోదు చేసుకొని దర్యాప్తు చేస్తున్నట్లు ఉప్పల్ పోలీసులు తెలిపారు.
