మధుమేహాన్ని అదుపులో ఉంచుకోవాలంటే కేవలం తినే ఆహారంపై మాత్రమే దృష్టి పెడితే సరిపోదని నిపుణులు స్పష్టం చేస్తున్నారు. ఏం తింటున్నామనే దానితో పాటు రోజూ మన జీవనశైలి ఎలా ఉందో చూసుకోవడం కూడా చాలా ముఖ్యం. ముఖ్యంగా డయాబెటిస్ లేదా ప్రీడయాబెటిస్ ఉన్నవారు కొన్ని చిన్న చిన్న అలవాట్లను మార్చుకోవడం ద్వారా బ్లడ్ షుగర్ లెవల్స్ను సులభంగా అదుపులో ఉంచుకోవచ్చు. మరి ఆహారంతో పాటు పాటించాల్సిన ఆ 3 ముఖ్యమైన విషయాలేంటో చూద్దాం..
రోజూ శారీరక శ్రమ తప్పనిసరి: శరీరానికి తగిన శ్రమ ఉంటే ఇన్సులిన్ సరిగ్గా పనిచేసి గ్లూకోజ్ స్థాయిలు అదుపులో ఉంటాయి. దీనికోసం గంటల తరబడి జిమ్లో కష్టపడాల్సిన పనిలేదు. భోజనం తర్వాత కొద్దిసేపు నడవడం, లిఫ్ట్కు బదులు మెట్లు వాడటం, ఉదయాన్నే చిన్నపాటి వ్యాయామాలు లేదా నడక అలవాటు చేసుకుంటే బ్లడ్ షుగర్ త్వరగా తగ్గుతుంది.
కావాల్సినంత నిద్ర చాలా అవసరం: సరైన నిద్ర లేకపోతే శరీరంలో కార్టిసాల్ వంటి ఒత్తిడి హార్మోన్లు పెరిగి రక్తంలో చక్కెర స్థాయిలు ఎగబాకుతాయి. ఇక నిద్రలేమి వల్ల ఆకలి, అనవసరపు తిండిపై కోరికలు పెరుగుతాయి. అందుకే రోజూ ఒకే సమయానికి పడుకోవడం, పడుకునే ముందు ఫోన్ స్క్రీన్లకు దూరంగా ఉండటం ద్వారా మంచి నిద్రను పొందవచ్చు.
ఒత్తిడిని దూరం పెట్టాలి: దీర్ఘకాలిక ఒత్తిడి (స్ట్రెస్) డయాబెటిస్ బాధితులకు పెద్ద శత్రువు. ఇక మనస్సు తీవ్ర ఒత్తిడికి గురైనప్పుడు కాలేయం నుంచి గ్లూకోజ్ విడుదల పెరిగి షుగర్ లెవల్స్ హఠాత్తుగా పెరుగుతాయి. అందుకే యోగా, ధ్యానం లేదా నచ్చిన పనుల్లో గడుపుతూ ఒత్తిడిని తగ్గించుకోవడంపై శ్రద్ధ పెట్టాలి.
మధుమేహాన్ని తగ్గించుకోవడం అనేది కేవలం పథ్యం పాటించడంతోనే కాకుండా, రోజూ సరైన శారీరక శ్రమ, మంచి నిద్ర మరియు ప్రశాంతమైన మనస్సుతోనే సాధ్యమవుతుంది. ఇక ఈ మూడింటినీ జీవనశైలిలో భాగం చేసుకుంటే ఆరోగ్యంగా జీవించవచ్చు.
గమనిక: మీ బ్లడ్ షుగర్ స్థాయిలలో ఎక్కువ హెచ్చుతగ్గులు ఉన్నా లేదా తీవ్రమైన అలసట అనిపించినా వెంటనే మీ వైద్యుడిని సంప్రదించి సలహా తీసుకోండి.
