ఉరుకుల పరుగుల జీవితం, ఆఫీసు ఒత్తిళ్లు, కెరీర్ పోటీ.. వీటి మధ్యలో మనం దేనికోసం పరుగెడుతున్నామో మర్చిపోతున్నాం. ఒక్కసారి ప్రశాంతంగా కూర్చొని ఆలోచిస్తే అర్ధమవుతుంది. మనం పిల్లల భవిష్యత్తు కోసం సంపాదిస్తున్నాం అని సరిపెట్టుకుంటున్నాం కానీ, వారికి అసలు కావాల్సింది మన ‘సమయం’ అని గమనించలేకపోతున్నాం. ఇంట్లో అందరూ ఉన్నా, పలకరించే తీరిక లేక పిల్లలు స్మార్ట్ఫోన్లకో, టీవీలకో, ఒంటరితనానికో అలవాటు పడిపోతున్నారు. ఆ నిశ్శబ్దం వారి ఎదుగుదలపై ఎలాంటి ప్రభావం చూపుతుందో, మనం తీసుకోవాల్సిన జాగ్రత్తలేంటో ఇప్పుడు చూద్దాం.
పెరిగిన దూరం – మౌనంగా రోదిస్తున్న బాల్యం: నేటి కాలంలో తల్లిదండ్రులు ఇద్దరూ ఉద్యోగస్తులు కావడం వల్ల పిల్లలతో గడిపే సమయం తగ్గిపోయింది. ఆఫీసు పని ముగించుకుని ఇంటికి వచ్చాక కూడా ఫోన్లు, ల్యాప్టాప్లతో గడపడం వల్ల పిల్లలు తమ మనసులో మాటలను చెప్పుకోవడానికి ఎవరూ లేక మానసిక ఒంటరితనానికి గురవుతున్నారు. కొందరు పిల్లలకు టీవీ చూడమని, లేదా ఫోన్ ఇచ్చి వారి పని వారు చేసుకుంటారు. ఇది అప్పటికి బాగుంటుంది.
కానీ, ఈ ఒంటరితనం వారిని మొండిగా మార్చడమే కాకుండా తెలియని భయాలకు, ఆందోళనలకు గురిచేస్తుంది. పిల్లలకు ఖరీదైన బొమ్మల కంటే, పక్కన కూర్చుని మాట్లాడే అమ్మ నాన్నలే ఎంతో అవసరం. డే మొత్తం లో కొంత సమయం వారికీ కేటాయించలేరా? ఆలోచించండి.
డిజిటల్ వ్యసనం – ప్రమాదకరమైన ప్రత్యామ్నాయం: తల్లిదండ్రులు అందుబాటులో లేనప్పుడు పిల్లలు సహజంగానే ఫోన్లకు, గేమింగ్కు బానిసలవుతున్నారు. మొదట్లో ఇది కాలక్షేపంలా అనిపించినా నెమ్మదిగా అది వారి సామాజిక నైపుణ్యాలను నాశనం చేస్తుంది. బయట ప్రపంచంతో సంబంధం లేకుండా గదికే పరిమితం కావడం వల్ల వారిలో సృజనాత్మకత తగ్గిపోతుంది.
అలాగే, ఇంటర్నెట్లో దొరికే అనవసరమైన సమాచారం వారిని తప్పుదోవ పట్టించే ప్రమాదం ఉంది. తల్లిదండ్రులు బిజీగా ఉంటూ ఫోన్ ఇచ్చి చేతులు దులుపుకోవడం వల్ల పిల్లలు భావోద్వేగాలకు దూరమై రోబోల్లా మారుతున్నారు.
పిల్లల బంగారు భవిష్యత్తు కోసం కష్టపడటం తప్పు కాదు, కానీ ఆ ప్రయాణంలో వారిని దూరం చేసుకోకూడదు. రోజుకు కనీసం ఒక గంట గ్యాడ్జెట్లను పక్కన పెట్టి వారితో మనస్ఫూర్తిగా మాట్లాడండి. వారి స్కూల్ విశేషాలు, చిన్న చిన్న గొడవలు, వారి విజయాలను అడిగి తెలుసుకోండి. వారితో కలిసి భోజనం చేయడం, ఆడుకోవడం వంటివి వారిలో భద్రతా భావాన్ని నింపుతాయి. మీ ప్రేమను మించిన ఆస్తి వారికి మరొకటి లేదు. చిన్నప్పుడు మనం ఇచ్చే ఈ సమయమే వారు పెద్దయ్యాక మనల్ని గౌరవించేలా చేస్తుంది.
గమనిక: పిల్లలలో ప్రవర్తనా మార్పులను గమనించినప్పుడు వారిని విమర్శించకుండా, ప్రేమతో దగ్గరకు తీసుకోండి. అవసరమైతే చైల్డ్ సైకాలజిస్ట్ సలహా తీసుకోవడం వల్ల వారి మానసిక ఆరోగ్యాన్ని కాపాడుకోవచ్చు.
