ఇద్దరూ తెలుగు వెండి తెరపై తమదైన ముద్ర వేసినవారే. సూపర్ హిట్లు, బ్లాక్ బస్టర్లు అందుకున్నవారే. ‘అబ్బనీ తీయనీ దెబ్బా..’ పాటకు డ్యాన్స్ చేసినా.. ‘కన్నె పిట్టరో కన్ను కొట్టరో..’ అనే సాంగ్కు స్టేజ్ దద్దరిల్లేలా స్టెప్పులేసినా.. వారికే చెల్లింది. చాలా కాలం తర్వాత ఇప్పుడు ఇద్దరూ ఒకేసారి తగ్గేదే లే అంటున్నారు. సై అంటే సై అని కదం తొక్కుతున్నారు. ఇంతకీ ఎవరు వారు అనుకుంటున్నారా? వారే తెలుగు అగ్ర కథానాయకులు మెగాస్టార్ చిరంజీవి, కింగ్ నాగార్జున. వీరిద్దరు నటించిన సినిమాలు ఇప్పుడు బాక్సాఫీసు వద్ద తలపడనున్నాయి. దీంతో ప్రేక్షకుల్లో అసక్తి మిన్నంటింది. అక్టోబర్ 5న మెగాస్టార్ చిరంజీవి ‘గాడ్ ఫాదర్’, నాగార్జున ‘ఘోస్ట్’ సినిమాలు దసరా సందర్భంగా విడుదలకు సిద్ధంగా ఉన్నాయి.
చిరంజీవి సెంకండ్ ఇన్నింగ్స్లో కాస్త ఆలోచించి అడుగులు వేస్తున్నట్టు అనిపిస్తోంది. విరామం తర్వాత ఆయన ‘ఖైదీ నెం.150’తో రీఎంట్రీ ఇచ్చారు. ఆ సినిమా అద్భుత విజయం సాధించింది. ఆ తర్వాత సైరా నరసింహా రెడ్డి, ఆచార్యతో ప్రేక్షకులను అలరించారు మెగాస్టార్. ప్రస్తుతం దర్శకుడు మోహన్ రాజా తెరకెక్కించిన చిత్రం ‘గాడ్ ఫాదర్’తో మరోసారి ప్రేక్షకుల ముందుకు రాబోతున్నారు.ఈ సినిమా మలయాళ మెగాస్టార్ మోహన్ లాల్ సూపర్ హిట్ మూవీ ‘లూసిఫర్’కు రీమేక్గా రూపొందుతోంది. అయితే ఈ చిత్రానికి అదనపు హంగులు అద్దడం కోసం బాలీవుడ్ ప్రముఖ నటుడు సల్మాన్ ఖాన్ స్పెషల్ రోల్ చేశారు. ఇటీవలే చిరు, సల్మాన్ జీప్లో ఉన్న ఫొటో సోషల్ మీడియాలో వైరల్ అయ్యింది. సల్మాన్ ఖాన్ మెగాస్టార్తో చిరు స్టెప్పులేశారు.
ఇటీవల విడుదలైన ఈ సినిమా ట్రైలర్ ఆసాంతం ఆకట్టుకుంది. ఈ చిత్రంలో మెగాస్టార్ సరికొత్తగా కనిపించనున్నారు. కుర్తా వేసుకుని గడ్డంతో ఉన్న కటౌట్తో.. ఈ మెగా బాస్ తన మాస్ గ్రేస్ను చూపించబోతున్నారు. గోవిందుడు అందరివాడు సినిమాలో చిరంజీవి గెటప్కు దగ్గరగా ఉన్న ఈ లుక్.. మళ్లీ మెగాస్టార్ జాతరను ‘గాడ్ ఫాదర్’ రూపంలో తీసుకురాబోతోంది.చిరంజీవికి జోడీగా నయనతార సందడి చేయనుంది. ఈ సినిమాలో నయన్.. ఓ పవర్ఫుల్ రోల్లో ప్రత్యేకంగా కనిపించనుంది. తమిళ ప్రముఖ నటుడు సముద్ర ఖని, మురళీ శర్మ, టాలీవుడ్ యువ నటుడు సత్యదేవ్ ప్రధాన పాత్రలు పోషిస్తున్నారు.
టాలీవుడ్ నవ మన్మధుడు.. నాగార్జున ఎడతెరిపి లేకుండా సినిమాల మీద సినిమాలు చేసుకుంటూ దూసుకెళ్తున్నారు. ‘ఎనీ జోనర్.. ఎనీ వుడ్.. ఐయామ్ రెడీ’ అంటున్నారు ఈ టాలీవుడ్ డాన్. తాజాగా బ్రహ్మాస్త్రలో వేయి నందుల శక్తితో ఆకట్టుకున్నారు. దసరాకు.. నాగ్ ‘ఘోస్ట్’ రూపంలో ప్రేక్షకుల ముందుకు రానున్నారు. ఈ చిత్రం కూడా అక్టోబర్ 5న విడుదల కాబోతుంది. కొరియన్ సినిమాకు రీమేక్గా రూపొందుతున్న ఈ చిత్రంలో.. భారీ యాక్షన్ సీక్వెన్స్లతో నాగ్ అదరగొట్టారని సమాచారం.
ఈ సినిమాలో నాగార్జున ఇంటర్ పోల్ ఆఫీసర్గా విక్రమ్ అనే పాత్రలో కనిపించబోతున్నారు. నాగార్జునకు జంటగా సోనాల్ చౌహాన్ నటించింది. ప్రవీణ్ సత్తారు దర్శకత్వంలో వస్తున్న ఈ చిత్రంలో.. హై యాక్షన్ సీక్వెన్స్లు ఉన్నట్టు వార్తలు వినిపిస్తున్నాయి. అయితే ఈ సినిమా కోసం తాను జపనీస్ కత్తులతో కత్తిసాములో ట్రైనింగ్ తీసుకున్నానని ఇదివరకే వెల్లడించారు నాగ్. మొత్తం.. యాక్షన్తో కూడిన థ్రిల్లర్ను అందించబోతున్నట్లు సంకేతాలిచ్చారు.
గాడ్ ఫాదర్’, ‘ఘోస్ట్’ సినిమాలు ఒకే రోజు విడుదల కానుండటం వల్ల ఫ్యాన్స్ ఆనంద పడుతున్నారు. అయితే దీనిపై ఇటీవల నాగ్ ఆసక్తికర కామెంట్లు చేశారు. “దసరా పండుగ అంటేనే ఇలా ఉంటుంది. మామూలుగా 40-50 ఏళ్ల నుంచి రెండు, మూడు సినిమాలు ఈ సందర్భంగా రిలీజ్ అవుతున్నాయి. ఇలాంటి పరిస్థితుల్లో సినిమా బాగుంటే బాగా ఆడుతుంది.. లేదంటే ఆడదు. అయితే ఏ కంపిటీషన్ లేకుండా ఒకే సినిమా విడుదలైనా.. బాగా లేకుంటే.. ఆ సినిమా కూడా అడదు” అని నాగార్జున ఇటీవల అన్నారు. గాడ్ ఫాదర్తో రాబోతున్న చిరంజీవిని శక్తిమంతమైన అప్పోనెంట్గా అభివర్ణించారు నాగార్జున. ఈ రెండు చిత్రాలు బాక్సాఫీసు వద్ద ఎంత మేర కలెక్షన్ల వర్షం కురిపిస్తాయనేది వేచి చూడాలి.
